صحيفة قوون الرياضية||شموا الهوا||

* اخيراً اصبح المريخاب يمكنهم ان يتحدثوا في (الكورة) .. اخيراً سمعنا لهم صوت.
* والله كويس.
* خلوا (المقصورة) ...الواحد فيهم بقي يجيب سيرة الكورة .. ويقعد ويتحدث ..وينظر كمان.
* علم والله.
* اخيراً اتفق معنا المريخاب في ان (الكونفدرالية) بطولة لا قيمة لها .. وهي من غير أي اثر رياضي.
* طيب دا ما كلامنا.
* نحن خمس سنوات بنتكلم في الحتة دي.
* يا دوب فهمتوا.
* يا دوب عرفتوا قيمة الفوز بالممتاز .. انتوا زمان ما قلتوا (الفضية) جميلة .. والكونفدرالية بطولة عظيمة.
* كونفدرالية مين يا عم.
* نحن عشان نحرجكم وندخلكم في (ضفوركم) سوف نلعب في الكونفدرالية بالصف الرابع.
* ناس احمد الفاضل .. والنعيم رونالدينو .. ومهيد .. ما بنديها اكثر من اللاعبين المسجلين تحت السن.
* ولا بنكذب.
* البرنس ومهند وفييرا والمعز ولا بناقش فيهم.
* دا شيء ما بنجامل فيه.
* قال ايه .. قال المريخاب الان اصبحوا يسخرون من الكونفدرالية .. والله نحن لو عارفنكم بتعملوا كدا كنا من التوالي الثالث اتنازلنا ليكم عشان نعرف رأيكم ونرجع نواصل في التوالي.
* توالي زي المسلسل التركي.
* مكسيكي بس.
* نحن لو عارفين كدا ما كنا وصلناه للتوالي الخامس.
* خمس سنين الجماعة ديل .. البتعرفوهم .. وبنعرفهم بتكلموا عن جمال الكونفدرالية .. حسنها .. روعتها.
* ونحن نشيل ونغالط.
* جابوا لينا فلايت من (الغلاط).
* يا جماعة الكونفدرالية دي استديو تحليلي ما فيها.
* هم يقولوا لينا استديو تحليلي نعمل بيه شنو؟ .. هو الفاضي للتنظير منو؟.
* نقول ليهم يا جماعة الكونفدرالية دي (دعايات) بين الشوطين ما فيها.
* هم يقولوا لينا الدعايات نعمل بيها شنو؟... هي كورة وإلا مسلسل عربي.
* يا جماعة الشيء دي مسيخة .. تسالي ما فيها .. تسالي شنو.. ترمس مافي.
* وهم يشيلوا ويغالطوا.
* طلعوا لينا الكونفدالية بطولة ما فيها أي كلام ... بطولة زي العسل.
* اها فجأة كدا .. (الحكام) قالوا ندي المريخ السنة دي كأس الممتاز .. خمس سنوات الجماعة ديل ما شافوا فيها شيء غير (الطابق التاني).
* الطابق التاني.. سيخو اتحرك.
* الطابق التاني.. كراسيه اتشحنت من الامارات.
* الطابق التاني.. جمركوه.
* الطابق التاني.. مظلتو وصلت بورتسودان.
* الطابق التاني .. الطابق التاني .. الطابق التاني.
* خمس سنوات نحن بالطريقة دي.
* اها وقت فترنا من (الغلاط) قلنا نقطع لسانهم .. خليناهم يشيلوا كأس الممتاز .. عاوزين نشوفهم بقولوا شنو عن (الكونفدرالية).
* 24 ساعة ما اكتر .. 24 ساعة بس ظهروا لينا بحقيقتهم.
* اول حاجة نسوا الطابق التاني.
* تاني حاجة دوروا لينا في الكونفدرالية.
* فجأة كدا الكونفدرلية بقت بطولة ضعيفة وما فيها أي نفع .. وكلها حمام ميت.
* طيب نحن خمس سنوات ما بنقول في الكلام دا.
* جابوا ليهم رويحة .. شموا العافية .. شموا الهوا وبقي في الامكان ان يتحدثوا في الكورة.
* الناس ديل طلعوا فاهمين كويس في (الوصافة).
* يشيلوا ويجيبوا في (الوصافة).
* انتوا يا جماعة بتهاجموا في تاريخكم .. بتسخروا منو ...
* نحن اصلاً ما مختلفين معاكم .. انتوا الخدمة البتقدموها لينا الان تفوق التصور.
* اتفقنا.. الكونفدرالية بطولة ما نافعة وضعيفة .. بطولة زي ملاح البامية.
* اتفقنا.. الوصافة دي اسوأ حاجة .. زي حبوب الملاريا.
* اتفقنا .. ابقوا علي كلامكم دا .. الغلاط في شنو طيب.
* اصلوا الزول وقت يشم الهوا بعمل كدا.
* دي حاجة طبيعية ما فيها أي حاجة ..بتحصل في ارقي العائلات.
* بتحصل علي اعلي مستوايات.
* غايتو طمبل واكرم الهادي سليم ما قصروا معاكم .. شالوا ليكم الكأس من العرضة شمال وجابوه ليكم في العرضة جنوب.
* ناس قلق والعجب يجروا جري الوحوش ما يلقوا غير (الوصافة).
* نديكم (كلاتشي) سلف .. كلاتشي قالوا بقي بالاجرة زي التاكسي متل بسطاوي.
* سجلوه عليكم الله .. ما تودوه جزيرة الفيل.
* شبهينا .. واتلاقينا.
* مبروك عليكم .. او مبروك لجزيرة الفيل.
* احكي ليكم مثال.
* لو في زول كان محبوس.
* مثلاً قول كان محبوس خمس سنوات.
* قاموا فكوه.
* عارفين اول حاجة بقولها شنو الزول دا بعد ما يعمل كرامتو.
* ما عارفين.
* اول حاجة بقولها بعد ما يتكيء (يا دوب شميت الهوا).
* والزول لو كان راقد مستشفي.
* قول مثلاً كدا رقد مستشفي خمس سنوات.
* بعد ما يطلع من المستشفي ويعمل كرامتو عارفين بقول شنو؟.
* ما عارفين.
* بقول بعد ما يضوق العافية: (يادوب شميت الهوا).
* والزول لو كان مهاجر.
* قول مثلاً كدا كان مهاجر خمس سنوات.
* ورجع بعد الخمس سنوات وعمل كرامتو عارفين اول حاجة بقولها شنو؟.
* ما عارفين.
* اول حاجة بقولها وهو بتمشي في البلد :(يا دوب شميت الهوا).
* هوا البلد ما سمح !!.. كمان عاوزين تغالطوا.
* والزول وقت يكون مديون .
* قول مثلاً مديون خمس سنوات .. قام فجأة كدا لقي ليه قروش وحل دينو وفتح تلفونو . عارفين اول حاجة بقولها بعد ما يرجع القروش الكان شايلها.
* ما عارفين. يا جماعة ما عارفين .. دا شيء بغالطكم فيه.
* انتوا متخيلنو بقول (يا دوب شميت الهوا).
* لكن الزول المفتح دا ما قال كدا .. قال حاجة تانية.
* لازم الفيلم الهندي يكون فيه نهاية مختلفة.
* عارفنو قال شنو؟.. والا انسي.
* خلاص ما تتضايقو الزول دا وقت رجع القروش ما قال (يا دوب شميت الهوا).
* طيب قال شنو يا ود الناس.
* قال :(يا دوب شميت الهوا) .. لكن بالانحليزي .. اصلو زولكم عامل فيها مفتح.
* ملحوظة: عندكم كلام تاني.
هوامش
* احسن مجلس ادارة نادي الهلال وهو يصرف النظر عن كلاتشي .. .
* صلاح ادريس اولي له ان يهاجم الذي حفز اللاعب قبل 24 ساعة من مباراة القمة بدلاً من ان يصرف كل هجومه علي كمال شداد.
* علاء الدين يوسف حفزه الهلال عند التسجيل و لم يحفزه وهو بصفوف المريخ رغم انه كان في امكان مجلس الهلال ان ينهي الامر قبل مباراة القمة في كاس السودان لكن اخلاق الهلال ترفض مثل هذا السلوك .. وقد كان فييرا نجم اخر مباراة قمة يشارك فيها مع المريخ .. وهو الان نجم اخر مباراة قمة يشارك فيها مع الهلال.
* الهلال يحتاج للاعبين مثل علاءالدين يوسف.
* كرموا مهند الطاهر علي موهبته او علي (الهوبنة) وكرموا فييرا علي وفاءه واخلاصه العظيم.
* فييرا لم يكن مخلص مع الهلال فقط .. بل كان مخلص مع المريخ ايضاً وهو لاعب في صفوفه.
* الزي ناس كلاتشي ديل ما بلزمونا.
* كلاتشي مكانو الوصيف.
* اقصد مكانتو في جزيرة الفيل.
* كمان جزيرة الفيل عاوزين تنكروها.
* (النكورة) البتعملوا فيها دي ما بتحلكم.
* نجي لي لوزان. .. نيل الحصاحيصا قال ما بمشي .
* انتوا ما قلتوا نحن لوزانيون. .. (لوزنة) للصباح.
* السنة دي كل الدلائل كانت تشير الي امرخة الممتاز.
* الدولة تدعم ..والسلطة تمهد .. والاتحاد يحلل لهم ويحرم للهلال .. والحكام يشيلوا ويقبلوا في الهدايا.
* نحن لو عارفنكم بتهاجموا الكونفدرالية ما كنا خليناكم تحتاجوا للتعب دا كلو.
* شيء باليد. وشيء ينقضوا الهدف. وشيء لوزان. وشيء وشويات.
* لكن الهلال الله يحفظو .. وجماهيرو الله يسعدها
* جماهير تفرح بالجد. يسدوا عين الشمس. يملوا العين.
* يكفي منهم كل هذا الحب.
* خبر عاجل: بكرة ان شاء الله نتكلم عن (المقبرة) لو ما اعتذرت ليكم.

تعليقات الزوار

هنالكـ 26 تعليق

عليك الله يامحمد انت بتتكلم عن شنو كل مره تنطط يبدو انو هستيريا فقدان الكاس لى هسه مؤثره فيك , وبعدين شايفك صلاح ادريس كترت ليهو التطبيل والاطناب اصلو مابتطلعو غلطان وصاحبك بتاع (مرض كل يوم) طلعو غلطان فى موضوع كليتشى , وين الحياد الصحفى اللى بتتكلمو عنو

اسامه خلف الله (كشامر) (نشرت: 20/11/2008 - 10:03)

مبرووووووووووك للمريخ الممتاااااااااز. وربنا يقدرهم لبطولة الابطااااااااااال. مع اني هلالابي لكني بشجع كل من يشارك خارجيا لاني وطني.. ويا محمد كفاية الكلام عن كلاتشي ود حق من حقوقه والراجل ما قصر معانا القدمو للهلال كتيييير..ومافي داعي لنكران الجميل يا هلالاب زي ما جاء بارادته خلوهو يمشي بنفس الاراده.. ملحوظة: ياريت الشعب الرياضي يفهم معني الاحترااااااف.

محمد ادم الطيب ود امبدة (نشرت: 20/11/2008 - 10:00)

كان الراي حقي والله حقو تخلي الكتابة في الصحف وتمشي تبقى تاجر طعميه صدقني حتستفيد00

'طارق ابو حجيل (نشرت: 20/11/2008 - 09:52)

الكونفدرالية ما بتقدروا عليها انتو سيكافا غلبتكم لكن نحن فرحانيني لاننا دايرين نضحك فيكمالسنة دي وانتوا بتوسعوا شبكتكم للحمام الميت شعار الكونفدرالية السنة الجاية وسع شبكتك وخليك هلالابي ومع النجم مش ح تفدر تغمض عينيك! انشروا يا ناس قون

nana (نشرت: 20/11/2008 - 09:37)

حكاية دعم الدولة للمريخ دي صعبة شديييييد علي الاهلة. (والله يستر)

خالد (نشرت: 20/11/2008 - 09:35)

يفتح موبايلو دى حلوه منك اسى الناس دى خمسه سنه قافلين خشمهم طلع الخاسر الاكبر الشركه السودانيه للاتصالات شدادتل قالت نديهم البطوله عشان نستفيد ان شاء الله اقل شى يعفو لينا الديون وارضاء المؤتمر

بمزااااااج (نشرت: 20/11/2008 - 09:29)

بل الهواء ضربكم..وليس جيداً ما تفعلونه بكلاتشي الذي منح الخرطوم ولاكثر من مرة ليلها ورقصتها..ما الفرق بينكم والموردة التي شطبت علي دليل التسامع.. ابدواأبنو ليكم فريق قوي وستستطيعون ان تفعلوها بعد خمسة سنوات (يادوب تشموا الهوا). هوا البلد ما سمح !!.. كمان عاوز تغالط!!؟؟ ياود الديون نصيحة: أحملوا صلاح علي اعفاء ديونه علي الهلال والهلال سيتحرر و حتشموا الهوا هلال يفرح بالجد. يسد عين الشمس. يملا العين * ملحوظة: عندكم (قروش) تاني!!؟؟

أشرف خليل (نشرت: 20/11/2008 - 09:29)

ياود عبد الماجد ناس قريعتي راحت ديل كفاية عليهم الخمسة وإلا رئيسهم حايشرد

محجوب (نشرت: 20/11/2008 - 08:46)

أولاً يا أستاذي العزيز مافي مريخي واحد قال الكونفدرالية ضعيفة والدليل إنو بطل أبطال أفريقيا النجم الساحلي بذات نفسه هو الآن على مشارف نيل البطولة (تعرف النجم الساحلي)الكان بيلعب فيهو(الشرميطي)بتعرفو زي جوع بطنك , وتمنيت فوز المريخ بالممتاز ما عشان نقول فزنا بيهو بس عشان الهليل المهلهل يلعب في الكونفدرالية الإنتو قلتو بطولة حمام ميت حتى النجم لمن لعب فيها وفاز عليهو المريخ سميتوهو النجم الساهلي إختشو علي عرضكم وبنحيا وبنشوف هليلكم في الكونف بسوي شنو محمد جرماكي عاشق المريخ السعودية/الرياض

محمد جرماكي (نشرت: 20/11/2008 - 10:22)

الناس دي كلو مره مطلعين زول باع لما اكملوهم واخشو علي مجلس الاداره عواجيز كده هربو المدربين ناكرين جميل وبقولو الكلام وبصدقو غالط كمان والمقبره كان فيها عرس جماعي يوم (17\11) غالط كمان

cabaca_bs (نشرت: 21/11/2008 - 02:59)

يا أستاذنا الديبة ما قال عامل فيها نصير مظاليم ريكاردو وبيعلب ناس النعيم وأحمد الفاضل مالو رجع لي قديم الهليل المعروف تشكيلة لو أنا نايم بعرف المهلهل اللاعب فيهو منو؟قال الصف الرابع قال وقدامكم الدروة العربية قبل الكونفدرالية بس خليكم قدر فصاحتك دي يا بتاع اليابان الوهمية القربت تجيب ليك هلوسه وربنا يدي الجميع الصحة والعافية وطولة العمر أديك 10 سنة لي قدام يا ودعبدالماجد لو هليلكم الخرفان شرف السودان بي كأس حتى ولو بتاع مهرجان ليك مني هدية قيمة ويبقى الأمل محمد جرماكي السعودية / الرياض

محمد جرماكي (نشرت: 20/11/2008 - 10:28)

الظاهر انت محرش ما تجب كتاباتي بس الناس البكونو معاك في عملية الابر والتخدير واصلا مش الهلال والمريخ انت تسمي الهرجلة دي البتحصل في السودان دي كورة وكمان لا كورة ولااخلاق حليلك يا المر ويا الضب ويا الاسد ويا الاسيد ويا ابراهيم عطا ويا كما ل عبد الوهاب الدكتور ويا كوري اخوان اذهب فانت مش من الطلقاء

جمال الدين مرحوم خيري طة (نشرت: 20/11/2008 - 10:48)

يا محمدبن عبد الماجد المريخ عظيم والمريخ كبير والهلال ايضا والفوز على الكبير شرف ومشكلتكم انتم الاهله لاترون فى المريخ شى جميلا وانكم تكرهون المريخ اكثر من حبكم للهلال وكل ممتاز والمريخ تام ولام وللكاسات خام الى مع الصفر الكبير

المعتز الشريف (نشرت: 20/11/2008 - 11:45)

يا استاذ الهوا ده لوكان ماشلنا الممتاز قبل كده معليش ، لو ماضقنا طعم المتواليات فيهو برضو معليش ، لكن لو زول عمره 78 سنة ولغاية هسع ما جاب ليهو كاس جوي ، تفتكر حا يجي يوم ويشم الهوا ؟ كلاتشي بعد ماكان حبيبنا اصبح فجأة غريمنا ! وين ثقافة الاحتراف .

ahmed - doha - qatar (نشرت: 20/11/2008 - 11:45)

أتشرف بأن أكون اول المعلقين علي عمودك وهي عباره عن تحف قمة في الروعة_ يا ود عبدالماجد الناس لما تشم الهوا بتكون بتستاهل انها تشم الهوا ما بتجيبو بي تحكيم وأتحاد المريخ عفوا اقصد أتحاد شداد بس يا معركه امدرمان انتهت ونحن مقبلين علي معركه الخرطوم وكاس السودان ودايرين خروف العيد دمو احمر احمر وحبه أصفر ولكم التحية

محمد ابوضفائر2001 (نشرت: 20/11/2008 - 12:41)

يا ود عبد الماجد صباح الخير خليك من المريخ شوية انت لو صحفي محترف حاول في هذا التوقيت من اصلاح الحال في الهلال يا اخوانا كلو من صلاح ادريس هو لو صحي كلاتشي قبض قروش من المريخ ليه لعب المباراة ثم تانيا ادارة الهلال كانت وين خلونا من الفتيش لي كبش الفداء اتغلبتو من النجم قلتو المعز اتغلبتو من المريخ قلتو عمر بخيت هسي قلتو كلتشي لانو رفض يحدد وبقى ورقة محروقة قلتو تعلقوها فيهو ثم تانيا ليه الكلام دة ما اتقال بعد المباراة مباشرة ولا الطبخة ما كانت تمت اها الدور علي منو في كاس السودان انشروا

ماااازن (نشرت: 20/11/2008 - 13:00)

بتسخر من منو عندكم كلام تاني. في قمة كاس السودان سوف نلعب بالصف الرابع نحرجكم وندخلكم في ضفوركم . يا جمال الوالي الهلال حمام ميت

nizar (نشرت: 20/11/2008 - 13:34)

والله يادوب شمو الهواء ومن حقهم لانو خمس سنوات كتيرا والكنفدراليه نورت با حلى هلال

محمد عطاالله - - - ناس ملواد (نشرت: 20/11/2008 - 13:58)

* نحن عشان نحرجكم وندخلكم في (ضفوركم) سوف نلعب في الكونفدرالية بالصف الرابع. * ناس احمد الفاضل .. والنعيم رونالدينو .. ومهيد .. ما بنديها اكثر من اللاعبين المسجلين تحت السن. كدى انت العب بالصف الاول وحاول سامعنى حاول اصل للنهائي وبالمرة كدا جيب الكاس الجوى عشان تطلعوا من الصفر الدولى الكبير دا ؟؟؟؟؟؟؟؟ اقول حاجة اصلوا دورى المجموعات ( خللوه )اصلوا النهائى وما تتغلبوا زي المريخ اغلبوا فى اخر مبارة عشان تشيلوا الكاس يا ابطال؟؟؟؟؟؟؟؟؟؟؟؟؟؟؟؟؟؟؟ * ملحوظة: عندك كلام تاني ؟؟؟؟؟؟؟؟؟.

ابوفاطمة (نشرت: 20/11/2008 - 14:21)

واللة ياحمادة الكونفدرالية محمدانا محمدانا

FATH ELRAHMAN ABO ELGASIM (نشرت: 20/11/2008 - 14:34)

ح تلعبوا في الكونفدرالية.. شئتم أم أبيتم.. وبأمر الملك فيصل وأعوانه.. ومتأكد يا محمد با أبو لسان طويل من غير منطق ح تطيرو قبل المجموعات.. وح تقولوا ما شبهنا وما عاوزين!!! يعني إنتو شبهكم قادرين عليها؟؟؟!!! الخروج من نصف النائي أو حتى النهائي زي الخروج من التمهيدي.. قصرو لسانكم وإشتغلو بجدية عشان تجيبو ليكم بطولة دوليةتزينو بيها قلعتكم.. الفرصة جات لحدي عندكم.. إنتو عافرتو في الأبطال وإكتسبتو خبرة..يللا ورونا خبرتكم في بطولة (الوصفاء) طارق الجمري\مهندس زراعي\ مريخابي بفهم كورة

طارق الجمري (نشرت: 20/11/2008 - 16:11)

انت عارف ياحمادة الجماعة في الكونفدرالية كا بيلعبو مع فرق اول مرة نسمع عنها زي القطن قصير التيلة في ابطال افريقيا في قطن طويل التيلة في ناس الاهلي المصري في ناس انيمبا. حنرجع الي المقولة الشهيرة الي الرشيد بدوي عبيد لمن قال بعد خسارة المريخ من فريق تونسي لاازكر اسم الفريق يمكن لمريخ التعويض بالجبل الاسود (منطقة في تونس) الجماعة جو راجعين 5/0 .علي العموم نتمني الي الجماعة التوفيق علشان معلقيت قناة ارتي مايقول الكورة في السودان متدهور نشوفكم

عماد عبداللطيف (نشرت: 20/11/2008 - 17:33)

الاستاذ محمد لك التحية والله كلتشي ماقصر وهو من المهاجمين المميزين وعلي الادارة تسعي جادة في اعادة قيدة ونت نسيت شوي والراجل لمن يكون عايش في جحيم من مرتو مدة خمسة سنين ويطلقا ويرقد في السرير ويخلف رجل فوق رجل يقول يادوووووب شميت الهواء

abdoaliamad (نشرت: 20/11/2008 - 19:18)

يا أستاذ نحن ضد الحملة غير العادلة علي كلاتشي ونرجو عدم تحميل اللاعبيين اخفاقات المجلس

ياسر احمد (نشرت: 20/11/2008 - 20:48)

والله الفرح الفرحنا احنا المريخاب انتم مليون سنة لن تفرحوا بيه ده سودان المريخ هل نسيت فرحة كاس الكئوس والله المريخ هيبة من زمان ونحن اطفال انتم بس فالحين ان جماهيركم كتيرة وين ده هل شفت انت فرحة المريخاب بكاس الكئوس الافريقية كل السودان في الشارع سلام

محمد (نشرت: 21/11/2008 - 01:03)

نسيت اسال ما شفنا لينا هوبه اكون نساها في البيت المخالفه بقت حجز

cabaca_bs (نشرت: 21/11/2008 - 03:03)

التعليقات المنشورة لا تعبّر إلا عن وجهة نظر أصحابها فقط