اخبار محلية ملاعب مقالات صفحات متخصصة فنية الدوري الممتاز كاس السودان بطولة أبطال أفريقيا لا توجد إستفتاءات 251 مُحركـ البحث : في الموقع في الانترنت Saudi Arabia Qatar UAE Egypt USA Germany UK China Canada France
251 مُحركـ البحث : في الموقع في الانترنت
صوتها المميز وطريقة ادائها لفتت إليها الأنظار منذ ظهورها الأول في الدورة الحالية من برنامج نجوم الغد ، وشيئاً فشيئاً كوّنت فهيمة عبد الله القادمة من قرية (نعيمة) بولاية النيل الأبيض قاعدة جماهيرية أصبحت تتابعها في اختياراتها المتعددة سواء في المديح النبوي الذي أصبح نغمة ترددها الهواتف السيارة في كل مكان أو في الغناء الحماسي الذي قالت فهيمة عن نفسها فيه أنها (مابتنقدر) لا سيما عندما تتغنى بأغنية الظايط مابنقدر سيل الوادي المنحدر ، فهيمة في ضيافة (قوون) تتحدث عن كيفية وصولها لبرنامج نجوم الغد ورؤيتها لمستقبلها الفني وتتحدث عن الذين وقفوا معها في بداية مشوارها وتحكي قصة لقائها الأول بالأستاذ بابكر صديق بالقضارف وتبدي فهيمة رأيها في المجموعة الحالية المشاركة في برنامج نجوم الغد وعدد من المواضيع الأخرى التي نتابعها عبر هذه المساحة .. نرحّب بك في صحيفة (قوون) ونود بداية أن نتعرّف عليك أكثر ؟ أنا فهيمة عبد الله من النيل الأبيض قرية نعيمة ولدت هناك ودرست بها الأساس والثانوي لكن انتقلت إلى الجزيرة حيث امتحنت الشهادة السودانية من هناك . أحكي لينا قصتك مع الغُنا بدت كيف ؟ أنا في الأساس ماكنت قاعد أغني كنت بمدح والأسرة كلها بتمدح بداية من الوالد ، الغنا عندي كان محصورا في الغنا الحماسي وبقدموا في المناسبات الوطنية لكن برنامج نجوم الغد كان السبب في إنو انا أغني غناء عاطفي . منو الأكتشف فهيمة كصوت جميل ؟ والله أبوي في البيت كان بمدح وأنا كنت بمدح معاهو ، أخواني في البيت كانوا بقولو لي أمدحي وكانوا بحبو صوتي ، نفس الشي المعلمات في المدرسة كانوا بحبوني وبطلبوا مني أمدح باستمرار . الكلام دا من عمر كم سنة ؟ من أولى أساس ، لكن بديت قبل كدا من عمري 5 سنة كنت بمدح والناس بقولوا صوتي حلو . طيب من وانتي صغيرة كنتي بتفكري في شنو ؟ هل كنت بتفكري تستمري بالمديح ولا فكرتي تكوني فنانة ؟ أنا لحدي الآن بفكر أكون مادحة وبس ، اتربيت على المديح وحافظة مديح كتير وبحب المديح أكتر وصوتي فيه أحلى وارتاح في المديح وإن شاء الله أكون مادحة . طيب كلمني عن حدث ممكن نسميه نقطة تحوّل بالنسبة لفهيمة يعني مهرجان شاركتي فيهو ؟ الدورة المدرسية كانت النقلة ، كنت في ثامنة ومشيت شاركت في القطينة وفزت وادوني شهادة وناس المدرسة عملوا لي احتفال ، من وقتها عرفت اني اكتسبت حاجة كويسة ، وبديت استمر في أي مهرجان أو مناسبة كبيرة أشارك والكلام دا استمرّ معاي لحدي الثانوي . ناس البيت كان رايهم شنو في الكلام دا خاصة المشاركات الخارجية ؟ والله ناس البيت أبوي كان بشجعني جداً ، لكن أخواني كانوا برفضوا حتى المديح . واقنعتيهم كيف ؟ بالعمل ، أي مناسبة مشيت أبوي كان بخليني أمشي والقى قبول من الناس ويتكلموا عني ، لقوا نفسهم موافقين ؟ نجوم الغد حكايتها معاك بدت كيف ووين ومتين ؟ والله نجوم الغد دي بالصدفة ، كنت في القضارف كنت مع ناس صندوق دعم الطلاب ، ومشيت شاركت بالضايط مابنقدر ، كان استاذ بابكر صديق قاعد ، بعد خلصت ، قال لي عندنا برنامج تجي تسجلي وانتي صوتك حلو فجيت هنا عشان أجيز صوتي بالمديح وأطلع شريط بالمديح ، وقلت أشوف الحاصل ، جيت القناة وأدوني مواعيد وعملت بروفات مع الناس وسجلت والحمد لله لقيت قبول وعندي جمهور كويس . يعني أنتي ماكنتي بتابعي البرنامج ؟ أبداً ماكنت بعرفو ، وأول مرة أسمع بيهو لما كلمني عنو أستاذ بابكر والوقت داك القناة كانت بالكرت ، يعني أنا ماعرفت البرنامج إلاّ لما سجّلت فيهو وبقيت بعد داك بتابع . رايك شنو في فكرة نجوم الغد كبرنامج ؟ الفكرة بالجد طالعة من زول عندو فهم وعندو وعي ، وبالجد أنا افتكرو برنامج كلمة ناجح بسيطة عليهو ، بقدّم الزول وبفرق أنو الزول يمشي براهو ويفتش الناس ، عندو شعبية ، وما أي غنا ممكن تغنيهو في لجنة وانت بتحس بالمسؤولية وانك لازم تقدّم حاجة قدر الناس القاعدين ديل ، برنامج كويس واستفدت منو كتير . الفرق شنو بين رهبة الجمهور ورهبة الكاميرا ؟ أنا الكاميرا ماقاعده أخاف منها ، بخاف من الجمهور ، قبل ما أبدأ ألقى المسرح مليان ناس أقول صوتي دا صغيرمابحصل الناس ديل كلهم ، أسي اتعودت وبقيت مابخاف لا من الكاميرا لا من الناس . في الأعمال البتقدميها بتشاوري منو ؟ والله بشاور ناس كتيرين ، أصحابي كلهم ، وأخواتي في أي اختيار ، مرات في ناس بختارو لي حاجات حلوة وبتظبط معاي، الشاعر والملحن . قبيل وقفنا معاك في تامنة سويتي شنو تاني في القراية ؟ واصلت وامتحنت الشهادة السودانية ودخلت جامعة الجزيرة ، بقرا لغة فرنسية ودراسات إسلامية والحمد لله ماشة كويس . بعد المشاركة الأولى ردود فعل الناس كانت كيف ؟ المشاركة الأولى ، ماقلت بحيا بعدها ، كنت خايفة خوف شديد ، كانت البداية ، أول مرة أشارك في مسرح زي دا ، وبرنامج مسجّل لكن عدّت واليوم التاني مشيت في الشارع أي زول يلاقيني عرفني يقول لي ازيك يا استاذة وانتي صوتك حلو وحتمشي لقدام والناس شجعتني . من ناسك أنتي أول زول علّق ليك منو ؟ في زول أنا بفتكر أنو أولى بالذكر في الفرصة دي اسمو عادل عبد الوهاب بحر في مدني زول رأسمالي ، كنت قاعدة في إتحاد الفنانين وبراي غنيت ، عندي مزاج أغني براي قام مسكني وقال لي وين يازولة أنتي قاعدة وعندك صوت زي دا، طوالي اتصل على مدير تلفزيون الجزيرة وعملوا لي لقاء وهو كان الزول الوحيد العرف أنو أنا أمشي لقدام انا من هنا بحييهو . يعني ظهورك في تلفزيون الجزيرة سبق ظهورك في قناة النيل الأزرق ؟ أيوه أول مرة سجّلت في تلفزيون الجزيرة لأني بقرا في مدني . في المجموعة المشاركة معاك منو اصحاب الأصوات المميزة ؟ الأصوات المميزة شول أديب وهو أسي مامعانا طلع من المنافسة أنا بعتبرو المنافس الحقيقي لأنو صوتو بالجد مميز وبرضو نادية . كلمني عن أجواء نجوم الغد والأجواء البتعيشوها والطرائف الفي الكواليس ؟ طرائف كبيرة ، المجموعة دي ماتتخيل أنو برنامج نجوم الغد دا مجرد برنامج في التلفزيون واستاذ بابكر بقدموا، بالعكس الحاجة دي مداها أكبر من كدا ، لو في واحد زعل بنسألوا زعل ليه وبنقول ليهو اشتغل كويس الناس بتصاحب بعض وبتتفقد بعض ، نجوم الغد أنا بعتبرو أسرة مترامية الأطراف . أدينا طرائف من الكواليس ؟ من الطرائف أنا أول مرة جيت ، مهند عازف الأورغن قال لي السلم شنو ، قلت ليهو أنا سلم مابعرفو ليك أنا بغني وانت شوفني أنا تابعه لأي ناس ، قام بعد سمع قال لي أنتي في (مي ميجر) قلت ليهو نحن لحدي هنا كويسين نحن الميجر دا عندنا بتاع موية لكن أنا في الموية بغني ليك مامشكلة ، دي كانت أول حاجة بيني وبين الناس . بعد نجوم الغد خططك المستقبلية شنو ؟ أنا عندي فكرة أعمل فيديو كليب لكم أغنية عاجباني والناس لسه ماسمعوها ، وفكرة الشريط مامستعجلة ليها . قدّمتي بعض الأغنيات الخاصة في البرنامج حدثينا عن الشعرء الذين كتبوها؟ قدّمت 5 أغنيات خاصة للشاعر كباشي حسونة ومصطفى ركابي والجيلي محمد صالح وحمد النيل الحجلي والأستاذ جمال عبد الرحيم والملحنين الدكتور عبد الماجد خليفة وصلاح جميل وفي شباب مدني أعمال جديدة حا أشتغلها فيما بعد . فهيمة بتسمع منو من الفنانين ؟ أكتر زول بسمع ليهو عثمان حسين وأمي ذاتها من المتعصبين ليهو والأستاذة حنان النيل . وفي المديح ؟ عبد الله الحبر وأولاد حاج الماحي . انتي قلتي أنو أهلك ناس مديح رايك شنو في المديح بالموسيقى والمديح بالطار؟ المديح بالموسيقى مامديح لانو الأورغن اتعمل أساساً للغناء باقي لي ، الزول العايز يمدح ويوصل المديح للناس يمدح بطار برق بنوبة بجرسدا المديح ، الأورغن دا بشتت الحاجة الحلوة الفي المديح . سمعنا إنشادك لكن ماسمعنا مديحك ، كنتي بتمدحي بي شنو والمعاك منو ؟ كنت بمدح بالطار ومعاي أختي هناء ، أخوي الأكبر مني بمدح بأورغن وبي طار وعندهم فرقة . دايرك تقولي كلمات في حق أسرة برنامج نجوم الغد ؟ اول حاجة ببدأ بالأستاذ بابكر صديق هو بهتم بالناس ، بحيهو على الفكرة دي وانا بعتبرها فكرة مجنونة ، بحييهو وبحيي الأسرة وبحيي الجمهور وكل زول عندو علاقة بالغناء الجميل ، وبحيي الأستاذ رمضان أحمد السيد وأحيي الأستاذ عبد الله عبد السلام ، وفي النهاية دايره أحيي زول عزيز علي شديد هو الفريق عبد الرحمن سر الختم أنا بالجد فاقداهو شديد في الجزيرة بحييهو كتير . ننتقل إلى والدة فهيمة ونسألها ، رأيك شنو في صوت فهيمة ؟ صوتها جميل شديد ، أنا بشجعها طوالي وبجي معاها ، أخوانها واحد متزوج وواحد بره . كيف مع وصول المنافسة إلى المراحل الصعبة ؟ والله الفراق حار الناس بقوا زي الأخوان ، أنا شايفاهم زي أولادي . الناس بقولوا ليك شنو عن فهيمة ؟ والله الناس اشادوا بيها شديد وأشكر أي زول صوّت ليها ، أستاذ بابكر ذاتو بنشكرو لأنو واضع لينا مكانة خاصة .
أكثر خبر قراءة • الوزير يعلن الاسماء اليوم وسط ترقب كبير ... يوسف احمد يوسف يترأس مجلس الهلال الجديد• صقور الجديان تنذر الكنغولي برباعية في تجربة المنتخب الاولمبي• المريخ يستعجل كاسروكا الاتحاد المالي يبرئ ساحة لاسانا ويعلن اختياره لمباراة الرأس الاخضر
أكثر خبر إثارة للتعقيبات • الاهلي العطبراوي يفجر اولي ازمات الموسم ويعلن انسحابه من الدوري التاهيلي• المريخ يستعجل كاسروكا الاتحاد المالي يبرئ ساحة لاسانا ويعلن اختياره لمباراة الرأس الاخضر• صقور الجديان تنذر الكنغولي برباعية في تجربة المنتخب الاولمبي
لا توجد إستفتاءات
