السبت 1 أكتوبر 2016
Test
شوية شجاعة وحبة قوة عين !!
25 مايو 2016
بالعربي الكسيح-محمد الطيب الأمين
-
أجمل ما في الفقر إنه يبعد عنك أصدقاء المصالح ..
-
الببقي صديقك وانت فقير بيكون قاصدك ما قاصد (جيبك) ..
-
في ناس بتصادق (الجيوب) ..
-
زول بيكون موقعه في حياتك هو : (صاحب جيبك) ..
-
بيكون (صديق شخصي) بالنسبة لجيبك ..
-
عشان كده الفقراء الصداقة عندهم عمرها طويل ..
-
وأنا على قناعة ان أسامة ونسي أفضل للمريخ من جمال الوالى ..
-
على الأقل أسامة ونسي ما عندو (أصدقاء جيبوب) ..
-
في ظل غياب نجوم الهلال سيلعب منتخبنا الوطنى مباراته عصر الجمعة أمام المنتخب الكيني بتشكيلة (90%) ستكون من لاعبي المريخ ..
-
وهذا بمثابة تحذير للأخوة الصحفيين والمصوريين بدولة كينيا الشقيقة ..
-
تشكيلة منتخبنا ستكون من عناصر المريخ ولذلك يُستحسن ان (يغطى) الصحفيين الكينيين المباراة من على شاشة التلفاز حافظا على أرواحهم ..
-
وفي النهاية لا عذر لمن أنذر ..
-
غايتو جنس غايتو !!
-
من الغباء ان تخرج من المنزل في اليوم الذى تكون فيه الكهربا عليكم ..
-
واللـه صحي ..
-
تكون عوير لو طلعت من البيت وخليت الكهربا وراك شغالة ..
-
أربط زياراتك للناس بيوم الكهربا ..
-
لو الكهربا عليكم ما تطلع من البيت ، ويوم الكهربا تكون ما عليكم أطلع ..
-
وحقيقة قطوعات الكهربا دي جابت لينا ناس جافونا زمااااااان ..
-
ناس نسيناهم عديل كده ..
-
ولكن ظهروا مع قطوعات الكهربا ..
-
ومن هنا لابد لنا أن نشيد بالحكومة على هذه القطوعات المبرجة التى أحيت التواصل وصلة الأراحم والزيارات المتبادلة ..
-
والأيام دي لو في محل شغلك عندكم (جننيتر) ما تستغرب لو كل البنات العرفتهن في حياتك سجلن ليك زيارة ..
-
عندنا صاحبنا عندهم جننيتر في محل الشغل كل يوم بتجيهو بت من أيام الثانوي ..
-
المهم ..
-
إحنا قررنا نستأجر (بيتين) ..
-
والبيتين كل بيت في حلة جدول كهربتها مختلف عن الحلة التانية ..
-
يعنى مثلا .. نستأجر بيت في أمبدة وبيت في الكلاكلة ..
-
يوم الكهربا تقطع في أمبدة نمشي الكلاكلة ..
-
والكلام ده كلو إستعدادا للرمضان ..
-
وفي النهاية الإيجار أرحم من شراء الجننيتر ..
-
جننيتر بـ(التاء) ؟؟
-
يدشن غدا نجم الهلال (اليافع) شرف الدين شيبوب الشهير بـ(عبرت) مشواره رسميا مع الفريق ..
-
وظهور شيبوب بـ(الأزرق الجميل) هى أمنية كل الهلالاب وبحمدلله تحققت ..
-
وشيبوب المتهم بـ(الرباط الصليبي) قدم أوراق إعتماده من أول تدريب وننتظر منه الكثير في الدورة الثانية ..
-
بمناسبة الدروة الثانية ..
-
أبراهومة الصغير بيعرف (ينط) ولا بعرف ؟؟
-
من شروط التسجيل في الهلال أن تكون (لعااااااب وبتعرف تنط) ..
-
وبما ان ذلك كذلك ، وإختصارا للزمن يجب ان يتعلم أبراهومة الصغير النط) منذ الآن ..
-
مصعب عمر بيعرف ينط لكن مشكلتو ما بيعرف كورة ..
-
مصعب لو بيعرف كورة كان بكرة ح يكون أساسي جوار شيبوب أمام سان جورج ..
-
قالوا على جعفر عشان يقنع الكاردينال بتسجيله في الهلال يوميا بنط من الطابق التاني ..
-
بتمرن على النط ..
-
مسكين ما عارف شيبوب نطة من الطابق الرابع ..
-
على جعفر بمستواه هذا لو (نطة) من الطابق السابع ما بيلعب في الهلال ..
-
داير تلعب في الهلال لازم تتمرن على النط من الطابق الرابع وانت ماشي ..
-
أقل من الطابق الرابع ما بينفع ..
-
قلتوا لي العملية إسمها الزراع الطويل ولا شنو ؟؟
-
أزرع جميل ولو في غير موضعه فأن (شيبوب) يقوم محل ما زرعتو ..
-
وتبكو بس .. عين قطرة وعين مس ..
-
للمرة الثانية يستعجل مجلس الهلال في تركيب الإضاءة وتشغيلها قبل (24) ساعة من موعد المباراة ..
-
مجلس الهلال ومن باب (الكلفتة) أحرجنا بالكشافات قبل مباراة الاهلى الليبي الافريقية ..
-
ورغم ان النشاط الرياضي بالنسبة للهلال متوقفا لاكثر من ثلاث أسابيع إلا ان مجلس الادارة (ياااااااداب) إفتكر موضوع الإضاءة وقرر تشغيلها اليوم حتى يلعب (تحتها) الفريق غدا ..
-
نظرية (يوم الوقفة) لا تتماشى مع صحوة الهلال الأخيرة ..
-
صحوة فريق الكرة يجب ان توازيها صحوة إدارية ..
-
بدون أذن .. غادر الثنائي كوفي وأوكرا ..
-
وأنا حقيقة الذي لفت نظري في خبر مغادرة الثنائي كلمة (بدون أذن) ..
-
بدون أذن هى كلمة إتكتبت في غير موضعها ..
-
الطبيعي ان يسافر الثنائي بدون أذن ..
-
وذلك لان الثنائي لو إنتظر الأذن من المريخ قطع شك ما ح يسافرو ..
-
شوف أنا أقول ليك حاجة ..
-
في لاعبين بيخاف من المريخ ..
-
بيخافوا منو باعتباره النادي رقم (2) في البلد دي ..
-
لكن أنا عاجبني جدا الأخ تراوري ..
-
تراوري وقع للمريخ لعامين ..
-
وقام لعب (3) شهور ..
-
بعد التلاتة شهور إنتهت طوالى سافر بدون أذن ..
-
تراوري بدون أذن مشى الأمارات سنة وشهرين لافي مع خطيبتو في دبي ..
-
وما في ولا زول سألو ..
-
يطلع من مول ويدخل مطعم ..
-
سنة وشهرين تراوري شغال كده ..
-
ما خلى ليهو مول ما دخلو في دبي ..
-
وفي النهاية لما فتر من اللف و(الخلط) جا راجع المريخ ووجد خانته فاااااضية ..
-
إتمرن التمرين الأول والتمرين التانى ومباشرة اساسيا ..
-
وحقيقة تراوري واقعة ليهو ..
-
ولعله قد إستفاد كثيرا من الحضري ..
-
الحضري بلغت به (قوة العين) درجة ان يكتفى بتمرين الصباح ثم يسافر عصرا حتى يشرب (شاي المغرب) مع زوجته في الإسكندرية ..
-
واللـه صحي ..
-
وأذكر جيدا ان صحيفة الأهرام قد كتبت بالحرف الواحد : (الحضري أكبر من المريخ) ..
-
والأرشيف مووووووجود ..
-
المهم ..
-
هسه اوكرا لو مفتح ما يجي قريب ..
-
يمشي الأمارات والدوحة والقاهرة ولما يزهج يجي راجع بيلقى خانتو في ..
-
وكوفي برضو ..
-
تمشى وتجي تلقاهم ياهم ذاتم ..
-
تلقاهم في نفس الحال ..
-
بس الشغلانية دي دايرة ليها قوة قلب ..
-
ما تخاف ..
-
تسافر عادي وتقفل تلفونك ولما ربنا يهون تجي راجع ..
-
لو لقيت أسامة ونسي ما بتتعاقب ولو لقيت جمال الوالى برضو ما تتعاقب ..
-
وأنا يا اوكرا بذكرك بحاجة ..
-
لازم تعرف إنو الحضري لما قال (جمال الوالى ما كان بيحلم يسلم على في يد) ، الحضري قال الكلام ده وبعد داك لعب (9) شهور للمريخ ..
-
يعني قال الكلام بعد داك لعب ..
-
يبقى من حقك يا كوفي تسافر بدون أذن وتجي في الوقت البريحك ..
-
وهكذا هو (الضل) دوما وابدا ..
-
ونركب صافنات ونجيبة (نوباوية) وأصلو الزول بيموت والذكرى تفضل حية ..
-
و..و..
-
وأشوف بكرة في الموعد تصور روعة ....(شيبوب بالأزرق) !!