Test

من المسلط ومن العين الشافتو وما صلت يغطي الله !!

28 مايو 2016

بالعربي الكسيح  - محمد الطيب الأمين
* من أكثر الأشياء إحباطا أن تضع الهاتف في (الشاحن) وتأتي بعد ساعة فتجد الشاحن لم يكن موصل جيدا ، وبالتالى لم يتم الشحن ..

* هذا محبط جدا ..

* ولكن الأكثر إحباطا أن تغادر مكانا (كهربتو قاطعة) وتذهب إلى مكان آخر(كهربتو شغالة)  وحينما تصل محل الكهربا شغالة تلقاها قطعت بينما المكان الذي غادرته (كهربتو جات) ..

* والأخ بكري المدينة ذهب للمريخ بحثا عن (كهربة القروش) وبعد أن لعب موسم واحد الكهربا هناك قطعت بينما في الهلال (كهربتنا جات) مع الكاردينال ..

* يبقى بكري المدينة شرب المقلب وشيبوب حسبها صاح ..

* بنقول لبكري : (خم وصر) ، وبنقول لشيبوب : (تستاهل هذا النعيم) ..

* فترة شيبوب بالمريخ كانت (حضانة) وفترته بالقيروان كانت (تمهيدي) وأمس الأول امام سانت جورج شيبوب دخل (المدرسة) ..

* وتبكو بس .. عين قطرة وعين مس ..

* فوز (همت) برئاسة إتحاد الخرطوم هو خسارة للكرة بولاية الخرطوم وتجسيد لمقولة (الرجل غير المناسب في المكان المناسب) ..

* وإذا كانت (النية) هي أن يدعم همت المريخ فأن همت عندما كان في النادي لم يدعم النادي ، ثم أن (مريخ الزمن ده) لو ساعدو ولو ما ساعدو وااااحد ..

* همت ما عندو حاجة يساعد بيها المريخ والمريخ لو ساعدو ياهو المريخ في حالو ..

* المريخ عمرو ما ببقى هلال ..

* تجري جري الوحوش وغير (الوصافة) ما بتحوش ..

* غايتو جنس غايتو !!

* روعة جمهور الهلال تتمثل في كونه (شناف) وما بحب (الدغمسة) ، عشان كده بعض الجماهير خرجت غير راضية عن أداء الفريق أمام سانت جورج ..

* ولكن الحقيقة الفنية تقول ان الشكل العام الذي ظهر به الهلال كان أكثر من جيد ، وقد وضح جليا ان هنالك (شغل فني) على مستوى حركة اللاعبين والتمرير والاستلام والإنتشار والإحتفاظ بالكرة وغيرها من التفاصيل الفنية ..

* ثم ان فريق سانت جورج هو الآخر لعب بتكتيك عالى جدا واثبت انه فريق محترم جدا ..

* وللأمانة لم نجد مبررا لذلك العنف الذي لعب به الفريق الضيف ..

* ما كان في سبب منطقي بيخلى الضيوف يخرجوا من (الأدب الرياضي) لذلك الحد الذي بلغ حتى (ضرب الحكم) ..

* حتى ناس سانت جورج عندهم (حاتم محمد أحمد وعلاء الدين يوسف) ..

* وأنا بصراحة لما كابتن سانت جورج ضرب الحكم خفت على الأخ المصور محمد دفع الله والأخ أبوبكر شرس (مصورا صحيفة قوون) ، خفت عليهما من (شلاليت) بوتاكو ..

* قلت لاعب سانت جورج بوتاكو بعد المباراة يمكن (يشلت) المصورين والصحفيين ..

* بمناسبة المصورين ..

* أخبار عقوبات (الكاف) شنو ؟؟

* عقوبة (الكاف) المنتظرة تشبه نتيجة (الفحص) ..

* والله صحي ..

* لكن طبعا ناس المريخ الأيام دي من كترت المشاكل والهموم ما شغالين بقرار (الكاف) المنتظر ..

* الأيام دي هم مشغولين بتنظيم المسيرة ..

* مسيرة لبيت جمال الوالى الشهير بـ(عزو) عشان يجي راجع ..

* غايتو (المسيرات) العملوها الناس ديل لجمال الوالى لو كان عملوها لمناصرة فلسطين كان اليهود إتخارجوا ..

* كل سنة عندهم مسيرتين تلاتة ..

* هسه جمال الوالى ده لو رحل (بتسيروا) كيف ؟؟

* إنتو ما غلطانين غلطان جمال الوالى الوراكم محل سكنو ..

* أنا متأكد الوالى بيكون ندمان إنو وراكم هو ساكن حى الصفا ..

* لو كان عارفكم كده كان قال ليكم أنا ساكن (الصالحة) أو (الردمية) أو (الشنقيطي) ..

* عندي سؤال في الحتة دي .. ممكن ؟؟

* إنتو ما بتخجلوا ليه ؟؟

* نحمد الله على نعمة الإسلام والموية الباردة والهلال ..

* حاجة تكسف ..  

* في علم (الدلوكة) جلد الضأن يطرب أكثر من جلد البقر ..

* أي دلوكة معمولة بجلد الضأن سيكون تطريبها أعلى من تلك الدلوكة المعمولة بجلد البقر ..

* ولو مغالطنا وما مصدقنا أسأل إنصاف مدني ..

* وبما أنا ذلك كذلك فأنني أكاد أجزم بأن كدارة شيبوب مصنوعة من جلد (الضأن) ..

* شيبوب لما يعمل (كسرة) ويمرر الباص أنت في المدرجات بتنفحك ريحة (الشية) ..

* لاعب بهذه المواصفات أستغرب والله كيف تركه المريخ (هاوي) ؟؟

* ناس المريخ خلو شيبوب (هاوي) وعملوا عقد إحتراف لمصعب عمر  ..

* أها مصعب ده إن شاء الله يضوي ليكم ..

* غايتو جنس غايتو ..

* كل الذي يحدث لأسامة ونسي هذه الأيام إنما هو محاولة (لتطميم بطنه من المريخ حتى يتخارج) ..

* والله صحي ..

* وما يتعرض له أسامة ونسي عيب كبير والله ..

* بلاغات وتصريحات وسخرية وإستحقار ..

* ده كلو لشنو ولمصلحة منو ؟؟

* أسامة ونسي تحمل المسؤولية في وقت صعب ونجح في مسيرته مع المريخ بدليل أنه لم يخسر بسباعية حتى الآن ..

* ونسي كان يحتاج لتعامل أفضل من هذا ..

* عموما .. (كلنا ونسي) ..

* وسأفرد مساحة مقدرة غدا بأذن الله للحديث عن أسامة ونسي ..

* يعني ناس المريخ ديل يا الزول يكون بتاع (لقيمات) ويا كمان ما بينفع معاهم ..

* عالم غريب ..

* المهم ..

* رفع المدرب بيلاتشي روح التحدي وسط اللاعبين ووضعهم في محك صعب جدا ..

* وضعهم في محك (البقاء للأفضل) وهذه سياسة سيجني ثمارها الفريق ..

* وكل المطلوب ان يرفع مجلس الإدارة يده تماما من فريق الكرة ويترك الخبير بيلاتشي يعمل وفق ما تتطلبه المصلحة ..

* ومهم جدا ان تكون هنالك تجربة افريقية ثانية ومن بعدها يمكن ان يلاعب الفريق فرق الدوري الممتاز لخلق الإنسجام والتناغم ..

* ولعل إنطباع الجمهور الأول عن النيجيري (عزيز) لم يكن في صالحه رغم ان الفتى يتمتع بامكانيات ممتازة ..

* الحكم على عزيز يحتاج لمزيد من الوقت والوقت الراهن يلزم التشجيع ورفع المعنويات بعيدا عن التنظير ..

* مباراة أمس الأول كانت ميلاد جديد لأبوعاقلة في خانة جديدة ..

* لعب أبوعاقلة في خط الدفاع وكان مدهشا ..

* أبوعاقلة هو من أكبر مكاسب الهلال طوال العشرين عام الماضية ولا نملك إلا ان نقول : (ماشاء الله ماشاء الله) ..

* وحقيقة قدم شيبوب نفسه بشكل مميز وكان شعلة من النشاط وتحرك مثل الغزال في الملعب ..

* شيبوب من أول مباراة (حلل قروشو) وأثبت انه سيكون إضافة كبيرة جدا للفريق ..

* شيبوب ضربة إدارية قاضية وقيمة فنية ضخمة ..

* الكشافات كانت (مغبشة) لكن مع شيبوب عملنا نفسنا ما شايفين ..

* شيبوب بيستر العيوب ..

* ونركب صافنات ونجيبة (جعلية) وأصلو الزول بيموت والذكرى تفضل حية ..

* و..و..

* ومن المسلط ومن العين الشافتو وما صلت يغطى الله ...


Share this