السبت 1 أكتوبر 2016
Test
ببقى ليك شاي الصباح وبترص جمبك بسكويت !!
31 مايو 2016
بالعربي الكسيح - حمد الطيب الأمين
-
واحدة من أكثر المقولات نفاقاً هي (خير خلف لخير سلف) ..
-
في كثير من المنابر يطلقون هذه المقولة من باب (كسير التلج) للخلف وللسلف ..
-
ولعل هذه المقولة تنتشر بشكل كبير جداً في عالم السياسة ..
-
يقول ليك : المعتمد ده خير خلف لخير سلف ..
-
بينما الحقيقة تقول إن المعتمد (الخلف) كعب ، والمعتمد (السلف) كعب تربيع ..
-
المهم ..
-
من الآن وصاعداً تشكيلة الهلال كلها ستكون (خير خلف لخير سلف) ..
-
حالياً يملك الهلال تشكيلتين
-
وكل تشكيلة تملك (احتياطي) منفصل عن التشكيلة الأخرى ..
-
وهذه الوفرة لم تتوفر للهلال طوال السنوات الماضية ..
-
إذا اعتبرنا الثعلب (خير سلف) فإن وليد علاء الدين خير خلف ..
-
وإذا اعتبرنا شيبوب (خير خلف) فإن أبوعاقلة خير سلف ..
-
وقس على ذلك ..
-
في المريخ مهما اجتهدت ما بتقدر تعرف منو السلف ومن الخلف ..
-
مصعب عمر (سلف) وعلي جعفر (خلف) ..
-
ومِنو العوض وعليهو العوض ..
-
حاجة تكسف ..
-
تعريف (الميتة وخراب الديار) هو : أن يصدر (الكاف) عقوباته ضد المريخ في هذه الأيام ..
-
هذا هو تعريف (الميتة وخراب الديار) ..
-
(خراب الديار) حالياً حاصل، باقي (الميتة) بس ..
-
باقي الميتة يا عيسى حياتو ..
-
غايتو السنة دي يا متنا من الضحك ويا كمان الضحك كتلنا ..
-
لاعب الهلال (ألوك أكينج) انخرط أمس الأول في تدريبات المريخ ..
-
وقد أسعدنا هذا الخبر لأن (الوقفة ممكن تضر ألوك) ..
-
ألوك أول لاعب في العالم تتم إعارته من الهلال إلى (تمارين المريخ) ..
-
وديناهو ليهم إعارة عشان يتمرن معاهم وبس ..
-
أمضى ألوك (6) شهور أولى مع المريخ دون أن يشارك في أي مباراة ..
-
وسيمضي الـ(6) شهور الثانية ولن يشارك في أي مباراة ..
-
قلنا ليكم الزول ده (ورقو) عندنا ماسمعتو الكلام ..
-
الورق في العرضة شمال والجسد في العرضة جنوب ..
-
الكاردينال قفل ورق ألوك في الخزنة وجدع المفتاح في أبعد حتة ..
-
زي لما الزول يكون عندو (فرخة) في التلاجة ويقفل التلاجة بالمفتاح ويرفع المفتاح في رأس الدولاب ..
-
لكن عندي ليكم مقترح ..
-
مش إنتو قبل كده جبتو زول (بصم) إنابة عن علاء الدين يوسف ؟
-
هسه جيبو ورق ريتشارد جاستن إنابة عن ورق ألوك ..
-
هكذا اقترح ..
-
وأي زول طبعاً حر في (اقتراحاتو) ..
-
وتبكو بس .. عين قطرة وعين مس ..
-
كثير من المتابعين يخافون على الهلال من الإرهاق، لا سيما وأن الفريق لم يرتاح بين الدورتين ..
-
فكرة جيدة أن يتعرف بيلاتشي على إمكانيات اللاعبين قبل انطلاقة التنافس ولكن هذا ربما يضعف تركيز النجوم الذين ظلوا في حالة ركض مستمر دون توقف ..
-
لا أعرف هل بالإمكان أن يمنح بيلاتشي اللاعبين راحة لأسبوع يعودوا بعدها لمواصلة التدريبات أم أن ذلك سيخل بالعمل الفني ؟
-
عموماً نتمنى أن يتجاوز نجوم الهلال كل الصعاب من أجل تقديم أنفسهم بشكل مختلف في الدورة الثانية ..
-
سعادة الوزير قال إنه يخشى على المريخ من مصير الموردة ..
-
كده يا سعادتو أنت ظلمت الموردة ..
-
واللـه صحي ..
-
ظلمت الموردة جداً يا سعادتك ..
-
إعلام المريخ زعلان من الوزير ..
-
الوزير يعمل ليكم شنو ؟
-
الوزير طالب لجنة التسيير بإكمال دورتها ..
-
وبعدين ياخ إنتو مستعجلين لشنو ؟
-
دي لجنة تسيير والجاية برضو لجنة تسيير، يبقى الاستعجال في شنو ؟
-
هسه لو كان الجاي مجلس منتخب معليش ممكن أقول ليكم تستعجلوا وتزعلوا من الوزير ..
-
لكن ماشه لجنة تسيير وجايه لجنة تسيير ..
-
خلفك لجنة تسيير وأمامك لجنة تسيير ..
-
وسيروا و(جيب) جمال الوالي يرعاكم ..
-
غايتو جنس غايتو !!
-
في ثقافة التربية السودانية كان في حاجة اسمها (دفعنا ليكم فلان) ..
-
يقول ليك (البت دي دفعوها لعمتها من وهي صغيرة) ..
-
العمة تقوم بتربية البت وتعتبرها واحدة من بنات ..
-
الحياة السودانية كانت بهذا الطعم العجيب ..
-
هسه طبعاً كثير من الأهل ما بعرفو بعض الأهل ..
-
في زمنا ده الأهل ما بتعارفو ..
-
المهم ..
-
بنفس النظرية دي إحنا (دفعنا) صلاح الجزولي لمازدا ..
-
دفعنا ليك عديل ..
-
اعتبره هدية من الهلال للمنتخب ..
-
مش قبل كم يوم الكاردينال اتبرع للمنتخب بـ(10) آلاف دولار ؟
-
خلاص الـ(10) آلاف دولار دي اعتبروها حافز تسجيل صلاح الجزولي في المنتخب لأربع سنوات قابلة للتجديد ..
-
قلنا للكاردينال شوف إعارة لصلاح الجزولي ومحمد عبد اللطيف هارون ولكنه لم يهتم بحديثنا ..
-
وبصراحة يا كردنة أنت عصرت علينا عديل بالاتنين ديل ..
-
محمد عبد اللطيف هارون وصلاح الجزولي أصلو ما ممكن يكونو الاتنين في نادي واحد ..
-
كان تعير واحد وتخلي واحد ..
-
لكن ما مشكلة شهر أطناشر قريب ..
-
ما علينا ..
-
الأيام دي لو عندك قروش عادي ممكن تبقى رئيس المريخ ..
-
واللـه صحي ..
-
ناس المريخ ما مهم عندهم الزول يكون هلالابي ولا موردابي ولا جزيرة الفيل ..
-
المهم إنك تكون عندك قروش ..
-
لو عندك قروش إن شاء اللـه تكون بتشجع الوحدات الأردني ما مهم ..
-
لو عندك قروش (ورثة) معقولة كده ممكن رئيس المريخ ..
-
أنا متأكد ناس المريخ ممكن يقبلوا بصلاح إدريس ..
-
متأكد بنسبة مليون في المية ..
-
وبكره يقول ليك صلاح إدريس أصلاً كان مريخابي زمن الجامعة ..
-
عندهم الحركات دي ..
-
من زمن أبو العائلة (الهلالابي) هم في الحالة دي ..
-
لكن طبعاً مستحيل ناس الهلال يقبلوا بجمال الوالي مهما كان ..
-
وده الفرق بين الهلال و(الإصيفر) ..
-
وإحنا يا جماعة لما نشكر أسامة ونسي ده ما معناها إننا ما عايزين ليكم جمال الوالي ..
-
بالعكس واللـه ..
-
جمال الوالي ده الخدمة البيقدمها للهلال أكبر من الخدمة البقدمها للمريخ ..
-
نحن بنستنكر الطريقة الرخيصة التي يتوسل بها إعلام المريخ لجمال الوالي ..
-
بصراحة طريقتكم بايخة جداً ..
-
طريقة ما بتشبه نادي ترتيبه رقم (2) في البلد دي ..
-
واللـه صحي ..
-
المفروض جمال الوالي هو اليسعى للمريخ مش المريخ يسعى لجمال الوالي ..
-
بالطريقة دي عملتو المريخ (هين) عشان كده يسهل الهوان عليه ..
-
شويه كده المفروض تكون في خجلة ..
-
خجلة بـ(الناء) ..
-
ونركب صافنات ونجيبه (دارفورية) وأصلو الزول بيموت والذكرى تفضل حية ..
-
و..و..
-
وببقى ليك شاي الصباح وبترص جمبك بسكويت !!