Test

نقطة سوداء في كراس خالي من الورق الأبيض !!

2 يونيو 2016

بالعربي الكسيح - محمد الطيب الأمين

  • إذا كان قرار إغلاق تجربة الهلال أمام المنتخب العسكري اليوم فنيا ، فلا غبار عليه ، أما إذا كان إداريا فعليه كل الغبار ..

  • أنا أخشى أن يكون القرار إداريا وسبب صدوره (منع الألتراس) من الحضور ..

  • أخشى ذلك وأرجو أن يكون ما أخشاه مجرد (خُزعبلات) ..

  • ويبقى الأكيد المؤكد أن (شباب الألتراس) لهم في خدمة الهلال (عرق) وكذا كل الروابط الهلالية العظيمة ..

  • الهلال حاليا إكتمل وأصبح جاهزا للمقارعة المحلية فقط ينقصه (تصفية النفوس وتحسين الإضاءة) ..

  • لو النوايا إبيضت والإضاءة تحسنت لن يشبع الجمهور من المتعة الهلالية ..

  • من حسنات أسامة ونسي أنه إنحاز للقيم الفاضلة وعاقب حاتم محمد أحمد قبل ان يعاقبه (الكاف) ..

  • ومن سيئات جمال الوالى أنه فشل في إثبات نسب (البصمة) فكان فييرا (حلالا على الهلال) وبقيت بصمتو (الما بصمتو) ذكرى خلدها التاريخ فأصبحت نقطة سوداء في كراس خالى من الصفحات البيضاء ..

  • الوالى لو كان في ما كان بيعاقب حاتم ..

  • بل إحتمال يبتعثه إلى (شنغهاي) للمشاركة في كورس تدريبي متقدم في (الملاكمة) ..

  • بمناسبة الملاكمة ..

  • عندي سؤال قد يكون تعسفيا ..

  • ليه بيقولوا (المصارعة الحرة) وما بيقولوا (الملاكمة الحرة) ؟؟

  • المهم ..

  • أسامة ونسي لو إستمر في المريخ ستة شهور أخرى لن تكون (اللقيمات) مؤثرة في نتائج المباريات ولا في وضع البرمجة والشكاوى ..

  • والـله صحي ..

  • ولكن مع هذه البلاغات والهتافات لن يستمر ونسي ولكنه سيخرج مرفوع الرأس ولو كره الإعلام السالب ..

  • غريب جدا إعلام المريخ الذي يتسول عودة الوالى (معينا) وبمقدوره أن يأتي (منتخبا) ..

  • إنهم يتعاملون مع الوالى وفقا لأغنية : (تعال بالعندك وأبوي بسندك) ..

  • مع تحريف بسيط في الأغنية : (تعال بالعندك والحكومة بتسندك) ..

  • غايتو جنس غايتو !!

  • أحيان يراودنا أحساس بأن هنالك حلقة مفقودة في موضوع إصابات النجم محمد عبد الرحمن ..

  • فهو كلما خرج من إصابة دخل في إصابة ربما تكون جديدة وربما تكون قديمة متجددة ..

  • إصابات ميدو تحتاج لشفافية وأمانة حتى نقف على حقيقتها ..

  • ولو كانت إصابات عادية فربما تكون (عين) ..

  • والعين يمكن علاجها بالرقية الشرعية وليس في ذلك عيب ..

  • التداوي بالقرآن الكريم مسموح به ، وفيه شفاء من كل داء ..

  • (العين) دي ذكرتني حاجة ..

  • قالوا بناتنا في السودان الواحدة لو جاتها (حمى) ناس البيت بقولوا ليها : (أدوك عين) ..

  • مع إنو سمية الخشاب أنصح من الحصان ..

  • زمان عندنا واحدة جارتنا ..

  • الزولة دي قدر ما تمشي ليها حفلة عرس بتجي تقول لينا : (في تلاتة نسوان خطبن لاولادهن) ..

  • كل ما تمشي عرس بتجي تقول نفس الكلام ..

  • مرة لبدنا ليها ورصدناها في إحدي الحفلات ..

  • الزولة دي من كرسيها ما قامت والكاميرا ما مشت عليها ولا في زول إشتغل بيها أصلا ..

  • تانى يوم سألناها : أها العرس كيف أمس ؟؟

  • قالت لينا : والـله أنا إكتشفت حاجة غريبة في العرس أمبارح ..

  • إكتشفتي شنو ؟؟

  • قالت : (إكتشفت إنو الرجال ديل ما عندهم ضمائر وعيونهم طايرة) ..

  • كيف الكلام ده ؟؟

  • قالت : والـله العريس ماسك العروس من يدها وبيشاغل فيني ..

  • يعني نظام العريس حس إنو إستعجل ..

  • جابتها (وارمة عديل) ..

  • ونفس الحركة دي عملها على جعفر مع ناس المريخ ..

  • قال ليهم : الكاردينال ماسك شيبوب في يدو وبيغازل فيني ..

  • غايتو جنس غايتو !!

  • في المريخ لما المحترف الأجنبي يمشى وطنه ويجي راجع ناس المريخ بيشوفها حاجة كبيرة جدا ..

  • والـله صحي ..

  • هسه أول أمبارح إعلام المريخ إتخلع لما عرف كوفي جا راجع ..

  • ما صدقوا ..

  • ما متوقعين إنو المحترفين يمشوا ويجوا ..

  • لكن ليكم على تراوري ده تاني إلا تشوف في مقاطع الفيديو ..

  • تاني ما بيلبس شعاركم ..

  • أمسكوا في كوفي ده كويس والفيهو خير الـله يعملو ..

  • حاجة تكسف ..

  • نزار حامد يسير على طريق مهند الطاهر فكلاهما دائما يلعب بمزاج عالى مع المنتخب الوطني ..

  • نرجو أن يكون مزاج نزار حاضرا أمام سيراليون وكذلك مزاج كاريكا والغزال وكل نجوم المنتخب ..

  • والأهم من هذا كله .. مزاج مازدا ..

  • بدون مقدمات تقدم المريخ بخطاب للإتحاد العام طالب فيه بتأجيل أو تحويل مباراته المعلنة أمام هلال كادوقلي والمحدد لها العاشر من الشهر الجاري بعاصمة الجبال ..

  • وقبل موسمين المريخ (رجاااله كده) رفض يمشي كادوقلى لمواجهة هلالها متعللا بأن كادوقلى (غير آمنة) ..

  • قالوا كادوقلى فيها حرب ومشوا (حرنوا) في كوستي ..

  • الآن المريخ يريد ان يلعب أمام هلال كادوقلي في الأبيض وأكيد عندهم الأسباب الممكن تقنع أسامة عطا المنان ..

  • أو بالأصح أسامة عطا المنان عندو الأسباب البيقنع بيها ناس المريخ بطلب التحويل أو التأجيل ..

  • ولكن نهمس في أذن الأخوة في هلال كادوقلي بأن يتعاملوا مع هذا الموضوع بشكل لا يقبل المساومة و(الحنك) ..

  • المريخ زيو وزي أى فريق يمشي يلعب في كادوقلي حتى لو كان في حرب ..

  • متين ح يكون للمريخ دور تجاه القضايا الوطنية ؟؟

  • كادوقلي الآن تعيش في سلام وأمان ولا ينقصها شئ سوى (مرمططت) المريخ داخل أراضيها ..

  • ناس كادوقلي يجب أن يتمسكوا بحقهم القانوني عشان نشوف (الدلع الأحمر ده اخرو وين) ..

  • قبل سنتين رفضتوا تمشوا ، والسنة دي ح تمشوا بالغصب الـلهم إلا لو كان أسامة ونسي ما مقتنع بأن كادوقلي آمنة ..

  • حتى لو إفترضنا إنو كادوقلي ما آمنة يفترض المريخ يمشي عشان يدعم الآمن والقوات المسلحة ..

  • ولكن كادوقلي آآآآآآمنة وآمنة جدا والأمطار فيها بتقيف عشان تجي ..

  • باقي إنتو المطر ده عندكم معاهو ذكريات صعبة في الأردن وما أدراك ما شلبياية ..

  • شلباية بـ(الثاء) !!

  • ونركب صافنات ونجيبة (حمرية) وأصلو الزول بيموت والذكرى تفضل حية ..

  • و..و..

  • ومن جديد جيت تاني تكسر صمتي بـــ.......(كرتونة رمضان) !!

 

Share this