Test

ما قدروا على المول والنادي الاجتماعي والفندق قالوا يعملوها (انضباط)

30 يوليو 2016
اتصوروا ليهم مع (صينيين) في شارع (عبيد ختم) وقالوا لينا ديل ناس (الشركة الصينية)
 
مدة المجلس المعين (6) شهور ..والآن يوشك ان يمضى من فترتهم (شهر) ، (طوبة) واحدة قدام نادي المريخ ما نزلوها
 
لو عاوزين تتقشفوا (11) عضو ممكن يقوموا بهذا (التقشف)..والله  موضوع (التقشف) دا ما عاوز ليه (28) عضو
 
الجماعة ديل ما تموا ليهم تلاتة اسابيع في المريخ …عاوزين يوقفوا بكري المدينة وعلاءالدين يوسف
 
 
    انتوا لو زعلانين من (شيبولا).
    نحن بنقدر موقفكم …وعارفين (البنكرياس) حقكم حالتو صعبة.
    نحن شايفين ومقدرين ومتأكدين انو سادومبا مقوم نفسكم.
    وشيبوب حارق (كلاكم)…ما تتفشوا لينا في علاءالدين يوسف وبكري المدينة.
    الرباط الصليبي ما بتعالج بـ (الانضباط).
    مريخابي وقت (شيبوب) انتقل للهلال وناس العقيد حسن محمد صالح اكملوا المهمة بنجاح تام …مشى للدكتور.
    المعني شنو؟.
    المعني المريخابي مشى للدكتور ..(اصبروا اكمل ليكم الكلام ما تلفحو الكلام متل باب المدرسة الما فيه غفير).
    المريخابي قال للدكتور : يا دكتور بعد شيبوب ما انتقل للهلال ما بتلقى لي (عذر) يفطرني في رمضان دا.
    السخانة دي والله ما بقدر عليها.
    المريخ دا زمان كان شايلو (شيبوب).
    عشان كدا لو عندكم حاجة – احسن امرقوا بيها عديل في الشارع ، بدل (الثورة الفرنسية) البتعملوا لينا فيها الآن.
    ابقوا واضحين.
    او ابقوا مارقين …تنططوا في عيونكم متل (الروسي) يوم السبت الصباح.
    نحن فترنا من الشعارات.
    والكلامات.
    والانضباطات.
    اظهروا عليكم الامان.
    قبل ان يصدر وزير الشباب والرياضة بولاية الخرطوم قرار تعين مجلس المريخ الاخير ، وعندما كانت تتم المناقشات وتطرح الاسماء ، كانت الاسماء المرشحة تبشر اهل المريخ بمشاريع استثمارية ضخمة.
    والمواصلات فاضية.
    والرغيفة كبيرة.
    والكهربة ما بتقطع.
    والموية باردة.
    واي حاجة زي الفل.
    حدثونا عن بناء فندق خمسة نجوم في نادي المريخ – وحددوا حتى مواقف سياراتهم جوار الفندق.
    والمواصلات فاضة.
    والرغيفة كبيرة.
    والكهربة ما بتقطع.
    والموية باردة.
    واي حاجة زي الفل.
    وحدثونا عن المول التجاري الكبير.
    والمواصلات فاضية.
    والرغيفة كبيرة.
    والكهربة ما بتقطع.
    والموية باردة.
    واي حاجة زي الفل.
    وعن الشركة الصينية.
    اتصوروا ليهم مع (صينيين) في شارع (عبيد ختم) وقالوا لينا ديل ناس الشركة الصينية.
    والمواصلات فاضية.
    والرغيفة كبيرة.
    والكهربة ما بتقطع.
    والموية باردة.
    واي حاجة زي الفل.
    كان المجلس المرشح لقيادة المريخ والذي تم من اجله الغاء الجمعية العمومية للمريخ يحدث الناس عن النادي الاسري في منطقة الحتانة.
    والمواصلات فاضية.
    والرغيفة كبيرة.
    والكهربة ما بتقطع.
    والموية باردة.
    واي حاجة زي الفل.
    حدثونا عن الكثير من الاستثمارات – يمين الله ما شفنا منها (طبلية).
    المشكلة ما في (الطبلية).
    المشكلة انهم اصبحوا سيرة الاستثمارات في خشمهم ساكت ما قاعدين يجيبوها.
    قطعوا الخبر.
    وعملوا رايحين…وعملوها لينا كلها (انضباط).
    وايقافات.
    مدة المجلس المعين (6) شهور ..والآن توشك ان تمضى من فترتهم (شهر) ، (طوبة) واحدة قدام نادي المريخ ما نزلوها.
    الاخطر من ذلك ..ان المجلس الذي يضم (28) عضواً …اصبح يتحدث عن (التقشف).
    يعني نحن جايبنكم عشان تتقشفوا لينا.
    نحن ناقصين (تقشف).
    لو عاوزين تتقشفوا (11) عضو ممكن يقوموا بهذا (التقشف).
    والله موضوع (التقشف) دا ما عاوز ليه (28) عضو.
    التقشف اصلو ما محتاج لهذا العدد من الاعضاء.
    ناس النسور…النيل شندي ..بتقشفوا.
    كمان (التقشف) عاوز ليه (عبقرية).
    عاوز الكم دا كلو؟.
    اخطر من هذا الذي ذكرناه ..(لو ما قاعدين تنسوا)…ان مجلس الاستثمار والمول والفندق خمسة نجوم اول قراراته التى اصدرها بعد اجتماعات متواصلة ايقاف بكري المدينة وعلاءالدين يوسف.
    خد.
    تموا الناقصة.
    انتوا بتعرفوا ليهم شنو عشان توقفوهم؟.
    عرفت من متين؟.
    الجماعة ديل ما تموا ليهم تلاتة اسابيع في المريخ …عاوزين يوقفوا بكري المدينة وعلاءالدين يوسف.
    دي أفة (التعيين).
    مجلس هو في حد ذاتو ما شرعي ..يوقف ليه لاعبين في المريخ قدموا له الكثير.
    الطريف ان المجلس قبل الايقاف …قال ما عاوزين اي لاعب يضرب للرئيس تلفون.
    تبقى المشكلة وين؟.
    التلفون قشفوه.
    انتوا وقت ما عندكم قروش …وعاوزين تتقشفوا …ما تعملوها واضحة كدا.
    تمنعوا حتى (التلفونات).
    وتوقفوا بكري وعلاءالدين يوسف.
    الشغل دا شغل (فلس) …ما شغل (انضباط).
    حكاية الانضباط ..واللوائح ..والنظام …دي (شعارات) ساكت ..وكلمة حق اريد بها باطل.
    الشغل دا شغل (تقشف).
    نحن بنعرف (الانضباط).
    وبنعرف (التقشف).
    الشغلة لو غلبتكم …اتنحوا.
    بعدين انتوا اخر من يتكلم عن الانضباط.
    جمال الوالي ذاتو ..عادي جدا يزعل ويقدم استقالته ويقفل تلفونه (6) شهور.
    رئيس النادي قاعد يعمل كدا.
    بعملها طوالي.
    بقت على (فييرا).
    الجماعة ديل نحن عندنا خطوط حمراء.
    ولا قاعدين نرضى فيهم.
    والمواصلات فاضية.
    والرغيفة كبيرة.
    والكهربة ما بتقطع.
    والموية باردة.
    واي حاجة زي الفل.
    الامر العجيب …(الكلام دا ما عاوز اقوله ليكم بالروسي ، عشان ما تتطلعوا برة الشبكة).
    واقطع رأسكم ساكت.
    احسن اجيكم بالباب عديل.
    الامر العجيب ان اعلام المريخ الذي كان ينتقد في مجلس اسامة ونسى وبيعتبر ان تمرد اللاعبين وانقطاع بعضهم من التمارين ناتج لانهم لم ينالوا حقوقهم ، ولأن المجلس مقصر معهم ماديا …عاد نفس الاعلام يشيد بمجلس جمال الوالي ويتحدث عن الانضباط والحسم.
    يعني ناس بكري وفييرا لمن يتمردوا في فترة اسامة ونسى بيعتبر تمردهم هذا بسبب عدم استلام حقوقهم من مجلس اسامة ونسى ..وتتوجه سهام النقد للمجلس.
    بعتبروا المشكلة في المجلس.
    نفس الامر وقت يحدث في فترة جمال الوالي بشيدوا بالمجلس وبطالبوا بضرب المتوقفين بيد من حديد.
    بعتبروا المشكلة في اللاعبين.
    عملوتها واضحة.
    ومكشوفة.
    وما عاوزه ليها كباية شاي.
    قرار ايقاف بكري وعلاءالدين قرار يفتقد للانضباط وهو قرار لن يصمد كثيرا.
    بعد اسبوع بنهار.
    ما تسمعوا لي شعارات (الانضباط) دي.
    المجلس نفسه سوف يرفع الايقاف وسوف يتحدث نفس الاعلام ويشيد بروح التصافي والتسامح في المريخ.
    الحاجات دي نحن حافظنها.
    وعارفنها.
    وشفناها الف مرة.
    وفترنا منها.
    والمواصلات فاضية.
    والرغيفة كبيرة.
    والكهربة ما بتقطع.
    والموية باردة.
    واي حاجة زي الفل.
    بعدين انتوا عاوزين الحقيقة وإلّا الجنبها.
    مجسلكم دا (مطرة) واحدة بتفرتكوا.
    المجلس دا موش جابوا والي الخرطوم.
    مطرة بتجيب خبرو.
    اصبروا بس.
    ونحن الهلالاب بنقولها ليكم عديل.
    كلنا بكري المدينة.
    وكلنا علاءالدين يوسف.
    خلاص عاوزين تنكروا حكاية (كلنا بكري المدينة).
    بقت ليكم حارة الآن.
    بتنسوا سريع انتوا.
    وبتغيروا مواقفكم.
    وبتشربوا الشاي (تقيل).
    شاي شنو؟.
    الشاي الدخلو هنا شنو؟.
    والمواصلات فاضية.
    والرغيفة كبيرة.
    والكهربة ما بتقطع.
    والموية باردة.
    واي حاجة زي الفل.
    …………
    ملحوظة : كدا افتكر وضحت.
 
هوامش
 
    في الهلال مطلوب ان تحل مشكلة محمد عبدالرحمن بصورة ودية.
    نحن ما عاوزين نفقد اي زول.
    لا في الرديف…لا في الشباب.
    المجلس المنظم والمجلس الناجح هو المجلس الذي لا تظهر فيه مثل هذه الاشكالات.
    عندما تكون هناك عقوبة بهذا الشكل ..تأكدوا ان الخلل في المجلس.
    اللاعبون لا يصلوا لهذا الحد ، إلّا في وجود مجلس ما بعرف الشغل.
    اللاعب صلاح الجزولي يستحق التحفيز على انضباطه والتزامه مع (الرديف).
    محمد عبدالرحمن مشكلته ممكن ان تحل في (5) دقائق.
    لماذا لا يلعب الهلال مباراة مع رديفه.
    هناك عناصر مميزة في الرديف.
    على الاقل بلاتشي يشوف الحاصل شنو في الرديف.
    فريق الرديف حقق انتصارات كبيرة على اندية الممتاز.
    واللعب امام الرديف سوف يكون مفيد للهلال من اللعب مع غيره.
    بكري المدينة ممكن ينزل تمارين مع (الرديف).
    رديف الهلال.
    هو المريخ عندو فريق اول عشان يكون عندو رديف.
    الدورة الثانية للممتاز سوف تكون قوية وفيها مباريات كبيرة.
    ركزوا في الاعداد.
    وركزوا في مباريات الدورة الثانية.
    ليس هناك شيء امامكم غير الدورة الثانية.
    هذا الموسم لا بد من الجمع بين الدوري والكاس.
    دي فرصتكم.
    اجمل ما في الهلال هذه الايام ان الفريق يملك ثلاثة فرق.
    غير (الجوهرة الزرقاء).
    الموسم القادم ..ما عاوزين الهلال يكون ناقص اي حاجة.
    عشان كدا لا بد من رصد العناصر التى يريدها الهلال في التسجيلات القادمة.
    شوفوا النقص وين؟؟؟وكملوه.
    ……….
    عاجل : يا علاءالدين وبكري المدينة ..نزلوا ليكم صورة بالكسكتة ..بيشطبوكم تاني يوم.
 

Share this