قاموا تاني جابوا سيرة (الشركة الصينية)

بي صراحة كدا واضح ان عبدالصمد محمد عثمان مسيطر على الموقف تماماً.. شغال اجتماعات ساكت

الشركة الصينية في (الجوهرة الزرقاء) وصلت للطابق الثالث ..وناس المريخ الى الآن في مرحلة (اجازة) عقد الشركة الصينية

انتوا يا ناس المريخ اقعدوا اتصوروا لي مع (الشركة الصينية) – والكاردينال بتصور مع (شيبوب)

في أخبار نادي المريخ أمس – هذا الخبر: (عقد مجلس إدارة نادي المريخ اجتماعه الدوري السابع برئاسة نائب رئيس مجلس الاداراة السيد/ عبدالصمد محمد عثمان بحضور الأمين العام للنادي سعادة الفريق عبدالله حسن عيسى، وأمين المال عوض الكريم رمرم ، وحضور مساعدي الرئيس وأعضاء المجلس، وذلك ظهر السبت 3- سبتمبر بقاعة الاجتماعات في المكتب التنفيذي للنادي).

• البشوف (الكوكلة) دي كلها بيفتكر (البص) فيه (فكي).
• يطرشنا – (الكوكلة) دي أول مرة نسمع بيها.
• خسارة اجتماعات ساكت.
• لكن بي صراحة كدا واضح ان عبدالصمد محمد عثمان مسيطر على الموقف تماما..شغال اجتماعات ساكت.
• حسب الخبر ,هذا هو الاجتماع السابع للجنة تسيير المريخ في الفترة التى أشرف عليها هذا المجلس على المريخ.
• في كل اجتماعات المريخ التي بلغت سبعة اجتماعات ..لم يتجاوز المجلس منطقة (الصور) مع الشركة الصينية.
• في كل اجتماعات مجلس المريخ هذا البند محلك سر : (اجاز المجلس عقد الشركة الصينية في شكله النهائي المقدم من القطاع الاقتصادي ،وأشاد بقطاع المنشآت والقطاع الاقتصادي على المجهودات الكبيرة التي تم بذلها في تفعيل الاستثمار والاهتمام بالمنشآت، وقدم شكره للجنة التسيير السابقة ولرابطة المريخ بقطر على المجهودات التي تم بذلها في انجاح استثمار الشركة الصينية).
• سبعة اجتماعات لمجلس المريخ يتم فيها اجازة عقد الشركة الصينية.
• نحن الما بتخصنا حاجة – فترنا من الموضوع دا.
• الشركة الصينية في (الجوهرة الزرقاء) وصلت للطابق الثالث ..وناس المريخ الى الآن في مرحلة (اجازة) عقد الشركة الصينية.
• الناس ديل ما بيكبروا.
• الناس ديل ما عندهم موضوع.
• ما بقنعوا.
• 28 عضو في مجلس المريخ – ما عندهم شغلة غير (اجازة) عقد الشركة الصينية ..وفي الهلال الشغل وصل للطابق الثالث.
• المضحك …ان مجلس المريخ في اجتماعه الأخير أشاد بقطاع المنشآت والقطاع الاقتصادي على المجهودات الكبيرة التي تم بذلها في تفعيل الاستثمار والاهتمام بالمنشآت.
• عليكم الله (اجازة العقد) عاوزة ليها مجهودات.
• الموضوع دا ما عاوز ليه (اشادة).
• موضوعكم دا محمد عبداللطيف هارون براهو في الهلال بينجزو.
• الموضوع دا ما عاوز ليه (28) عضو.
• ولا عاوز ليه مجلس شرف.
• الحكاية ما بتستاهل.
• القصة ما عاوزة ليها (شوقلة) قدر دي.
• يطرشنا – الشوقلة دي اول مرة نسمع بيها.
• طيب انتوا لو عملتوا ليكم (طابق) ارضي ساكت في استادكم كنت عملتوا شنو؟.
• كان اجزوا ليهم عديل.
• والله ديل لو عملوا ليهم غرفة ساكت في استاد المريخ كان جابوا حسين شندي ومحجوب كبوشية وعبدالله البعيو – عشان حفلتهم تدور (40) يوم.
• هسع حفلاتهم مدورة بي مزمل وسلك ومعاوية الجاك.
• اشادة شنو؟.
• الموضوع دا ما عاوز ليه (اشادة).
• تعبانين في الفاضي ساكت ..وعاملين ليكم قطاع منشآت وقطاع اقتصادي ..وما عندكم الحبة.
• عليكم أمان الله – الجماعة ديل ما شفنا منهم غير (الاجازة).
• والاجازة ذاتها بيلحقوها ليك بي (اشادة).
• نفسهم بقوم في الاشادة.
• رصيدهم بنفد في الاشادة.
• مجلس المريخ (بص الوالي) لو نزلوا ليهم (لوري طوب) قدام استاد المريخ – ما عارفهم كان بيعملوا شنو؟.
• مجلس المريخ قدم شكره للجنة التسيير السابقة ولرابطة المريخ بقطر على المجهودات التي تم بذلها في انجاح استثمار الشركة الصينية.
• بالله شوف الجماعة الما بخجلوا ديل.
• لجنة التسيير السابقة.
• ورابطة المريخ بقطر.
• ومجلس الشرف.
• الحكاية ما بتستاهل.
• لجنة فيها 28 عضو (بص الوالي) ، وما قادرين الى الآن يتجاوزوا مربع (اجازة) عقد الشركة الصينية.
• وفي كل اجازة بياخدوا ليهم (120) صورة.
• عدم موضوع.
• انتوا عارفين يا ناس لجنة تسيير المريخ ..البتشاكلوا ليكم في فاتورة صحفي رافق البعثة الى عطبرة ..الكاردينال شغال في الجوهرة براهو ..وعملها تلاتة طوابق وإلى الآن ما في زول عمل ليه (اشادة) من ناس الهلال.
• الكاردينال والعمل في الجوهرة وصل خواتيمه..ما اخد ليه الى الآن صورة مع الشركة الصينية.
• انتوا يا ناس المريخ اقعدوا اتصوروا لي مع (الشركة الصينية) – والكاردينال بتصور مع شيبوب.
• فترتكم باقى ليها (3) شهور.
• عملتوها لي كلها اشادة بي عقد الشركة الصينية.
• الشيء الغريب ان موضوع الشركة الصينية دا من زمن مجلس اسامة ونسي.
• وح يستمر كدا الى المجلس القادم.
• وما ح تشوفوا حاجة غير اجازة عقد الشركة.
• والاشادة بعد ذلك.
• نذكر السادة القراء ان مجلس المريخ (بص الوالي) الذي اشاد بعقد الشركة الصينية بعد ان انقضى نص فترة المجلس ، كان قد وعد جماهير المريخ بانشاء مول تجاري ضخم في النادي.
• ونادي أسرى في الحتانة.
• وفندق 5 نجوم.
• ونذكر ان هذا المجلس ابو (28) عضو لم يرسل عضو منه للعزاء في فقيد المريخ الذي رحل في نادي المريخ بسبب تهالك (السقف المستعار).
• والمجلس الى الآن بحدثنا عن الشركة الصينية.
• انتوا قاعدين لي متين.
• فترة المجلس تبقى منها (3) اشهر.
• والصراعات والخلافات تبدو واضحة بين اعضاء المجلس.
• الاخطر من ذلك ان الصراعات وصلت الجرايد والقروبات ..والبونية بقت مدورة في الاجتماعات.
• لذلك قد لا يكمل مجلس المريخ فترته بعد التصدع الذي حدث في المجلس أخيرا.
• مجلس المريخ لو كان مسكوه (الشركة الصينية)..واتخلصوا من الـ (28) عضو ديل ..كان احسن.
• إعلام المريخ الذي كان ينتقد في مجلس أسامة ونسى ..وكان يعيره بالفلس ..لماذا صمت الآن.
• لماذا صمت إعلام المريخ ولجنة تسيير المريخ التى تضم (28) عضو ..تعاني هي الأخرى من الفلس؟.
• كنتوا شايلنها ساكت مع اسامة ونسي.
• بص الوالي كله ما قدر يقدم للمريخ غير اجازة عقد الشركة الصينية.
• جماعتكم كل ما يتعصروا ..بيعملوا ليهم اجتماع ويجيبوا سيرة الشركة الصينية.
• ولمن يتعصرو اكتر كمان ..بيأخدوا ليهم صور مع الشركة الصينية.
• الشركة الصينية (مراقتهم).
• ما عندهم حل غيرها.
• الكاردينال عمل (الطابق الثالث) وانتوا لسه في الاجازة.
• 28 عضو ..ما قدروا يتجاوزوا المرحلة دي.
• المضحك في الامر ان إعلام المريخ قال في ازمة مالية في الهلال.
• لو بي أزمتنا المالية بنعمل الحاجات دي ..يبقى يا مراحب بالازمة المالية.
• اذا نحن بي طابقنا الثالث ..عندنا ازمة مالية.
• بي سادومبا.
• وشيبوب.
• وبلاتشي..
• عندنا ازمة…انتوا كيف؟.
• ازمة مالنا ..مدربنا محسن سيد.
• جبنا برهان.
• سجلنا صلاح نمر.
• ازمة شنو؟.
• ………
• ملحوظة : مهند الطاهر يوم الاربعاء عندو اكتر من هوبة.

هوامش

• التسجيلات باقي ليها شهرين.
• او أقل من شهرين.
• الدوري الممتاز بينتهي يوم 10 اكتوبر.
• الهلال محتاج ليه لمدافعين يلعبوا في قلب الدفاع.
• أمجد الجريف لاعب الأهلي شندي ومدافع المنتخب ..لاعب ممتاز وصغير في السن.
• وكذلك مدافع الخرطوم الوطني داؤود.
• صلاح نمر كان ثغرة في المنتخب.
• يعني انت يا مازدا عاجباك ثغرة صلاح نمر في المريخ ..عشان تنقلها للمنتخب.
• عمار الدمازين افضل منه الف مرة.
• وحسين الجريف.
• ومدافع الخرطوم الوطني داؤود.
• في ظل هذه المجاملات المنتخب ما بيشمي لي قدام.
• ولا تحلموا.
• مجاملات حتى في التشكيلة.
• مازدا اكتر من عشرين سنة وهو مدرب للمنتخب.
• ارحمونا شوية.
• محسن سيد في الشباب.
• وبرهان تية مع الكبار.
• ومازدا هنا وهناك.
• وعاوزين تمشوا لي قدام.
• غيروا لينا شوية.
• هناك اكثر من مدرب من حقه ان يأخذ حقه في هذه المناصب.
• بدلاً أن تصبح هذه المناصب حكرا للذين يشرفون على تدريب المريخ.
• محسن سيد وبرهان ..لو عاوزين يدربوا في المنتخب ..مفروض يتفرغوا لذلك.
• الثلاثاء يلعب الهلال أمام النيل شندي في الجوهرة.
• ثم يلعب الهلال في الفاشر ..جولات الحسم.
• مباراة الهلال أمام هلال ومريخ الفاشر ..الفوز فيهما سوف يحسم لقب الممتاز باذن الله وتوفيقه.
• المريخ أمامه مباريات كثيرة سوف يتعثر فيها.
• على الهلال ان يحسم مباريات الفاشر..يمكن ان يصبح الفارق 18 نقطة.
• استغرب كيف لا يضم جهاز الناشئين الكسمبر وحسن الحرية للمنتخب.
• هناك اكثر من لاعب في فريق ناشييء الهلال يستحق الانضمام للهلال.
• وهناك أكثر من لاعب في شباب الهلال يستحق الانضمام لمنتخب الشباب.
• هيثم مصطفى يفترض ان يكون مديراً فنياً لمنتخب الناشئين.
• ………
• عاجل: لو خليتوا الشركة الصينية دي ومشيتوا الدهب – أحسن ليكم…استفيدوا من زمنكم.