900 دقيقة فيها كم رطل؟

في العالم كلو ..بقولوا ليك ضع النقاط فوق الحروف …ناس الهلال ما شغالين الموضوع دا..ناس الهلال بيضعوا (النقاط) فوق الجيب

سادومبا عندو امل يلحق كلاتشي..سادومبا قال عندو مباراة قدام المريخ..الحمام قدام

في 90 دقيقة …المريخ ولجت شباكه (5) اهداف..ومكسيم 900 دقيقة ..نهي هدف

• خالد عزالدين عنده نظرية (النقاط).
• نقطة ما بفوتها ليك.
• مثلا يقول ليك (الفاشر) فيها كم نقطة؟.
• وسادومبا فيه كم نقطة؟.
• والنقطة فيها كم نقطة؟.
• والنقعة فيها كم نقطة؟.
• الغريبة – والمفاجأة ان (علم) ما فيها ولا نقطة.
• والهلال ما فيه ولا نقطة.
• ومحمد وكمال وسحر وامل ما فيهم نقطة.
• عشان كدا اي هلال واجه المريخ هذا الموسم شال منو (نقاط).
• هلال الفاشر ..هلال الابيض ..هلال كادوقلي…هلال السودان.
• المريخ السنة دي (مريح) جدا شالوا منو نقطة (الخاء) …او هو (مريح) للآخر..شالوا منو اللوحات ، اقصد شالو (نقاطو).
• قاعدين بلا نقاط.
• قالوا ليك في العالم كلو ..بقولوا ليك ضع النقاط فوق الحروف …ناس الهلال ما شغالين بالموضوع دا.
• ناس الهلال بيضعوا (النقاط) فوق الجيب.
• ويخلوا ليك ناس المريخ ينقطوا في الحروف.
• عليكم الله الزمن دا في زول فاضي عشان يقعد ينقط فوق الحروف.
• دي عدم شغلة بس.
• عشان كدا اللغة الانجليزية لغة (عملية) ، هي لغة المصطلحات الطبية ..عشان ما فيها (نقاط).
• الروشتات والتشخيص والفحوصات كلها بيكتبوها باللغة الانجليزية.
• واللغة الفرنسية لغة (علمية) القوانين والمعاهدات – برضو عشان ما فيها (نقاط).
• العقود والاتفاقيات بيكتبوها باللغة الفرنسية ..عشان اللغة الفرنسية واضحة ومحددة.
• وقد يكون بسبب تلك (النقاط) قالوا ان اللغة العربية لغة البيان والبلاغة والابداع.
• اللغة العربية لغة (فنية) – ممكن تتلاعب بالحروف والكلمات زي ما عاوز.
• نقطة ممكن تغير المعنى كلو.
• نقطة ممكن تقلب ليها بلد.
• المهم على طريقة سؤال خالد عزالدين في (النقاط) – عاوز اسألكم بعد ان وصل مكسيم حارس مرمى الهلال الى (10) مباريات دون ان تهتز شباكه هذا السؤال.
• عاوز اقول ليكم الـ (900) دقيقة فيها كم رطل لبن؟.
• طبعا السؤال دا ما قاطعو من رأسي كدا بس وخلاص.
• السؤال دا عندو مناسبة.
• وفيه نظرية.
• زمان كان معانا واحد اسمو (جمبل حسن كتمة).
• جمبل حسن كتمة دا ما تعاينو لي اسمو دا كدا وخلاص.
• جمبل حسن كتمة دا كان زول صعب.
• ما بتفاهم.
• ممكن يضارب في اقل شيء.
• جمبل حسن كتمة دا اول مرة يسمع بـ (رطل اللبن) اندهش اندهاشة غريبة خلاص.
• كأنو وصل القمر.
• شاف ليك (رطل اللبن) دا حاجة مدهشة.
• حاجة غريبة.
• عالم تاني.
• لمن عاوز يقع في الواطة.
• جمبل لم يكن يتخيل ان الدنيا الضيقة دي فيها حاجة اسمها (رطل لبن).
• الموضوع دا ادهشو ليك ادهاش …لمن قرب يبقى زي كرتونة العصير من الدهشة.
• متل الضيوف الما عارفين الوصف.
• متل العرس الما فيه عريس.
• زي الفول في البوفيه المفتوح.
• اندهاشة شديدة.
• يضحك وينزل في الواطة من الفرحة.
• يتفقع من الضحكة.
• جمبل حسن كتمة يومو الاكتشف (رطل اللبن) كأنو اكتشف (الذرة).
• عمل ليه صلعة ونضارة في الموضوع دا.
• ومشيتو في الشارع غيرها.
• اصلو ما قادر يستوعب الحتة بتاعة (رطل اللبن) دا.
• الموضوع ما عاوز يقع ليه.
• قدر ما فهموه..
• قدر ما قعدنا معاه ..عشان نفهموا حاجة في (رطل اللبن) – جمبل حسن كتمة دا ما فهم لينا الحاصل.
• بيني وبينكم (رطل اللبن) كان حاجة جديدة.
• حاجة غريبة كدا.
• شيء مدهش.
• بعد (رطل اللبن) ..طبعا نزل (رطل الباسطة).
• الارطال دي ما تهملوها.
• ما تجهلوها.
• الارطال دي زي موديلات الهواتف الجوالة.
• كل مرة تظهر ليك رسالة جديدة.
• قبل (رطل اللبن) طبعا كان بقولوا ليك (رطل سكر).
• موضة قديمة شوية.
• بعد رطل الباسطة ظهر رطل حلاوة لكوم.
• وقت رطل حلاوة لكوم دا ظهر ..الرطل دا عمل بدائع.
• عمل عمائل.
• اي زول في الحلة كان بيقشر ليك بالرطل بتاع حلاوة لكوم دا.
• يقولوا ليك عندنا خالنا في السعودية رسل لينا رطل حلاوة لكوم.
• وعمنا من فرنسا – كتر خيرو ما قصر ..جاب لينا رطل حلاوة لكوم.
• جمبل حسن كتمة كان واقف في رطل اللبن.
• اصلو ما عاوز يتزحزح لينا شبر من الرطل دا.
• جمبل حسن كتمة من شلاقتو بقى اي جملة يسمعها يركب فيها (رطل لبن).
• رطل اللبن دا بقى شغلتو.
• يشيل ويدخل فيه في الجملة.
• اغنية (وضاحة) بتاعة مصطفى سيد احمد لمن يسمعها لو ما دخل فيها (رطل لبن) ما برتاح.
• يقولوا ليه الزول دا بيصرف (4) الف جنيه.
• بقول ليهم الـ (4) الف جنيه فيها كم رطل لبن؟.
• ويا ريت لو الموضوع بقيف هنا.
• بقولوا ليه الزول دا مسافر تركيا.
• بقول ليهم تركيا فيها كم رطل لبن؟.
• الاتراك ديل بكون عندهم (ارطال) غريبة.
• جمبل حسن كتمة ..قاشر ليك بي موضوع (رطل اللبن) قشرة شديدة.
• بكون ماشي في الحلة براهو وبتكلم بي (رطل اللبن).
• يمشي افخم مطعم يطلب ديلفري وقبل ما يتحرك ..بقول للكاشير عليك الله اعمل لي (رطل لبن) برة.
• جمبل حسن كتمة لمن قالوا ليه مكسيم ليه 900 دقيقة ما دخل فيه هدف ..طوالي اسعفهم ليك بي رطل.
• كافحهم ليك مباشرة وقال ليهم الـ (900) دقيقة دي فيها كم رطل؟.
• يا ود الناس مالك عاوز تحرجنا مع ناس المريخ.
• الموضوع دا ممكن يتحسسوا منو.
• ممكن يتعقدوا.
• ويشعروا بالحرج.
• 900 دقيقة ..مكسيم ..ماشاءالله ..وتبارك الله شباكو ما اهتزت.
• مكسيم لعب في شندي.
• ولعب في النقعة.
• ولعب في نيالا ..وشباكه لم تهتز.
• حارس ليكم شبكتو (900) دقيقة.
• نملة ما بتخش.
• رقم قياسي جديد.
• وحدث فريد من نوعه.
• وحاجة تفرح.
• 10 مباريات – الكلام دا في الدوري الاسباني ما بحصل.
• في ملاعب راقية.
• وتحكيم نضيف.
• واضاءة قوية ..ما بحدث الكلام.
• مكسيم في ملاعبنا دي ..حافظ على شباكه (900) دقيقة.
• 900 دقيقة بدون هدف يدخل مرماه.
• انتوا قايلين قدامو منو؟.
• قدامو فداسي وعمار الدمازين وحسين الجريف.
• وبرضو (900) دقيقة ما في هدف دخل مرماه.
• عليكم الله بعد الموضوع دا ..ما عندي حق في موضوع (رطل اللبن) دا.
• الحكاية دي عندها علاقة بي (رطل اللبن).
• جيبوا ليكم (روسي) جديد – اول مرة ينزل السودان ..ممكن يطلع ليكم العلاقة بين المواضيع دي.
• الشغل دا ما بقدر عليه إلّا روسي.
• انا والله غلبني عديل كدا.
• دي 900 دقيقة.
• انتوا بتلعبوا.
• المعز محجوب في مباراة واحدة بيدخلن في مرماه (5) اقوان.
• تقول حارس ليه استراحة.
• في 90 دقيقة …المريخ ولجت شباكه (5) اهداف.
• ومكسيم 900 دقيقة ..نهي هدف.
• والله لو ما خايف عليكم من الاحراج ..كورنر ما تشموه.
• جمال سالم ..اي مباراة لعبها السنة دي مع المريخ اهتزت شباكه.
• علم.
• الشبكة الاوسع.
• الشبكة الاكثر استقبالا.
• شبكة الهناء والاقوان.
• مكسيم يستحق التكريم بعد هذا الرقم.
• الزول دا بحقق في حاجات صعبة.
• بعمل في شيء عجيب.
• …………
• ملحوظة : حالتها دي بي فداسي.

هوامش

• كليتشي برضو بحقق في ارقام صعبة.
• الاتحاد السوداني مفروض هذا العام يعمل تكريم خاص لمكسيم وكليتشي.
• سادومبا عندو امل يلحق كليتشي.
• سادومبا قال عندو مباراة قدام المريخ.
• الحمام قدام.
• المضروب من نيالا ما بطلع.
• ومن مدني ما بمرق.
• عشان كدا ..ناس الاهلي شندي وهلال الابيض ..يركزوا في المركز الثاني.
• اهلي شندي قادر على الانتصار على المريخ.
• والهلال طبعا ..دائما بفوز في استاد المريخ.
• ما عندو اي مشكلة.
• المباراة في استاد المريخ.
• وعبدالصمد قافل البلف.
• الهلال بينه وبين اللقب (4) نقاط.
• خلونا نركز في مباراة الفاشر القادمة.
• عشان نيالا ان شاءالله سوف تحسم اللقب للهلال.
• انتصار الهلال في الفاشر وتعادل المريخ في نيالا يتوج الهلال باللقب قبل اربعة اسابيع من انتهاء الدوري.
• لجنة الاستئنافات وين؟.
• بنحسم الدوري من قبل 4 اسابيع.
• لا بنستعين بالبرلمان.
• ولا رئاسة الجمهورية.
• ولا والي الخرطوم.
• ناس بشه بيحسموا اللقب من قبل 4 اسابيع.
• افتحوا ملف كاس السودان.
• الموسم دا – موسم الجمع (ميدانيا) بين الدوري والكاس.
• السنة دي (درع) ما بنخليه ليكم.
• لقب كليتشي ذاتو عندنا فوقو رأي.
• يا سادومبا ..شد حيلك ..وألحق كليتشي.
• يا بشه.
• نحن اصلو ما بنقنع.
• ولا بنقيف.
• الهلال عنده اربع مباريات في الخرطوم ..ممكن يعمل فيها اي حاجة.
• اربع مباريات سوف تكون احتفالية.
• اربع مباريات للمتعة ان شاءالله.
• المهم عندنا الآن الانتصار على مريخ الفاشر في الفاشر.
• بنمشي خطوة ..خطوة.
• خطوتنا المهمة الآن ..في الفاشر.
• مباراة هلال الفاشر اصعب من مباراة مريخ الفاشر.
• هلال الفاشر ..كان بقاتل من اجل البقاء.
• واصعب شيء تلعب امام فريق مهدد.
• مريخ الفاشر ..ما عندو دوافع.
• الدوافع كلها عند الهلال.
• ولا شيء غير الانتصار.
• ………..
• عاجل : 900 دقيقة يا ربي دي بالسوداني بتعمل كم؟.