Test

لممتاز بنحسمه بحسين الجريف والثعلب وبشه الصغير ورمضان كابو ما بلجنة الاستئنافات ولجنة الحكام

1 أكتوبر 2016

الوصافة ذاتها بقوا يجيبوها من مدني بضربات الجزاء والتكريم بين الشوطين

في احتفالية (الالعاب النارية) كان لا بد ان يكون هدف الامل من (نيران صديقة)

المريخ يجري جري الوحوش غير (الوصافة) ما بحوش

صلاح نمر في دفاع المريخ متل (رقم التلفون) الناقص ..يجري ويتلفت

الكاردينال بدل ما يشيل (النغمة) بقى اليوم والتاني يشيل لينا (المدرب)

 

من الغلاف للغلاف — يحررها محمد عبدالماجد عند اللزوم فقط

 

 

الاهداء

البنت الحديقة :

لونها (قمحي)…

قامتها (نخلية)…

شعرها (اسود)…

غضبها (عناقيد العنب)..

فستانها (ليموني)..

عرفتو ليه السودان (سلة غذاء العالم)….

محمد

 

احتمال

دخل فيه قندران بي ترلتو…

بعد (15) يوم الدكتور طلع من غرفة العمليات قال ليهم الحمدلله قدرنا نطلع (الترلة) من (الطوحال)..

في واحد منهم قال ليه يا دكتور (القندران) احتمال يطلع..

هسع دا (احتمال) ليك مع الناس.

 

بالحساب

طلب السمك في فرنسا فيه (17) سمكة.

في تركيا فيه (14) سمكة.

في تونس فيه (11) سمكة.

في غانا فيه (7) سمكات.

في مصر فيه (3) سمكات.

في الصومال فيه سمكة واحدة.

في السودان فيه (بصلة) وشوية (جرجير).

 

نيران صديقة

هدف الامل عطبرة كان من الطبيعي ان يكون من (نيران صديقة) ، لأن (الالعاب النارية) كانت حاضرة في الجوهرة للاحتفال باللقب.

 

الفرق واضح

الهلال في مباراة الحسم والفوز بالممتاز اشرك حسين الجريف وبشه الصغير ورمضان كابو وصهيب الثعلب وابوعاقلة.

بنفوز بالممتاز بـ (الاولاد) ديل ما بلجنة الاستئنافات ولجنة الحكام.

والله حكم مباراة مدني امس لو ما شعر بالخجل مع (ضربة الجزاء) كان عاوز يمنح المريخ (دكان ناصية) في سوق جاكسون.

 

لوحة إلكترونية

هدف شيبولا …نزل بي مدافع وطلع بالتاني…

استلم الكورة قبل ما تصلو…

مشي بيها (شرق) في اللحظة المشي فيها دفاع الامل عطبرة (غرب).

الحارس طلع عشان يشوف الحاصل شنو ..لقى الكورة في القون.

غايتو يا شيبولا بي حالتك دي لو لميت في  صلاح نمر..بتخلي ريحتو كديس كديس.

اول مرة اشوف لي (نمر) تقيل بالشكل دا.

 

نجم المباراة

قالوا ليك اللجنة الفنية لو ما شافتها شينة …كان عاوز تمنح نجومية المباراة للجوهرة الزرقاء.

 

اقتراح

رمضان عجب الموسم دا في المريخ زي (اللمبة) الواحدة في البيت …مرة يركبوها في (الحوش) ومرة يشيلوها (المطبخ).

ووقت يحتاجوا ليها في (الصالون) يشيلوها من المطبخ..

ووقت تكون في كركبة في البطن بركوبها في (الحمام).

زي رمضان عجب تماما مرة يلبعوه رأس حربة ومرة يرجعوه للوسط ومرة يلعب طرف يمين.

يحولوا فيه من حتة لي حتة زي (اللمبة) الواحدة في البيت الكبير.

هسع دا اقتراح دا.

 

خط 6

امير كمال قالوا بدأ تمارين عشان يرجع تاني بعد انتهاء فترة العقوبة التى فرضها عليه الاتحاد الافريقي.

امير كمال بعد (الوقفة) دي لو عاوز يرجع للمريخ ، إلّا يرجع يمسك ليهم (الحسابات).

كورة بعد الوقفة دي ما اظن.

 

تنظيم (داعش) الرياضي

  • اذا ارادوا ان يستهلكوا اكبر قدر من (الكروت الملونة) في الدوري الاسباني – علينا ان نصدر لهم (نصرالدين الشغيل وعلاءالدين يوسف).
  • اما اذا لعب (ضفر) في الدوري الانجليزي ..فاننا يمكننا ان نراهن منذ الآن على ازمة حادة سوف تحدث في (الكروت الملونة) في الدوري الانجليزي منذ الاسبوع الثاني.
  • هل يمكن ان يفسر (العنف) الرياضي الذي تشهده ملاعبنا على انه عنف (داعشي)؟.
  • داعش لم تخرج من فراغ ..هي نتاج وقائع واشياء معينة ادت الى ان يكون منها ذلك (العنف) في التعبير عن قضاياها واهدافها.
  • مهم جدا ان نعرف ان لي اي فعل ردة فعل مساويه له في المقدار ومعاكسة له في الاتجاه.
  • الكلام الفوق دا ..كلمة (عربية) واحدة ما فيه.
  • كلو انجليزي.
  • اتكلم ليكم (عربي) شوية.
  • مثلما هناك تنظيم (داعش) السياسي ..يمكن ان تكون هناك تنظيمات لداعش الرياضية.
  • ملاعبنا فيها ذلك التنظيم الداعشي.
  • في الكثير من المباريات الداخلية تتاح لنا مشاهدة ضرب وخنق وذبح وكتل…النقالة بتدخل وتطلع في الملاعب السودانية اكتر من الكورة.
  • وبنسمع في الكثير من تعليقات المباريات السودانية عبارة (الليلة الدم للركب).
  • عادي جدا ان نشاهد في مباراة كورة قدم في السودان اربع حالات كسر وتلات حالات بلع لسان ..و(74) حالة وفاة ..كما حدث في مباراة المصري البورسعيدي والاهلي القاهري.
  • وحدث بعد ذلك في مباراة الزمالك وانبي التى توفى فيها في الحال (22) مشجع.
  • ويمكن ان تنتقل لنا الحالة (الداعشية) الى ملاعبنا السودانية ..اذا لم تكن هنالك لوائح واضحة وقوانين صارمة تنظم اللعبة ..وترتب سيرها.
  • احسب ان الفوضى التى نعاني منها فوضى (ادارية)..هي لا جماهيرية ولا اعلامية.
  • نحن نعاني من فراغ اداري واضح ..ادى الى ان يغيب القانون عن الساحة الرياضية..لنحكم عبر الاجاويد والترضيات والموازنات والمصالح الخاصة.
  • لا اريد ان اتحدث (عربي) كثير.
  • خلونا في (البرتغالي) حقنا دا.
  • لو لعب نصرالدين الشغيل وعلاءالدين يوسف في الدوري الاسباني ..فكان الاول في برشلونة والثانى في ريال مدريد ..فان الاتحاد الاسباني يمكن ان يصدر تاني يوم (منشور) يؤكد فيه دخول الفكر الداعشي للدوري الاسباني.
  • ح تشوفوا (خبط) صاح.
  • يعني الحركات البعملوا فيها ناس ميسي ..ومليس الكورة ..وشقة شعر رونالدو والجل الذي يستعمله مع ناس الشغيل وعلاءالدين يوسف ما بنفع.
  • ولا بسمحوا بالحاجات دي.
  • الاسبان ..طبعا (متحسسين) شوية ..وشعورهم مرهف ..لو في لاعب كسر رونالدو او جاب (رباط صليبي) لميسي ..اكيد ح يقولوا دا لاعب (داعشي) خاصة اذا كان اللاعب من السودان.
  • اصلا نحن مستهدفين ..وندرج ضمن الارهابيين.
  • الشغيل لاعبنا دا …في الدوري الاسباني ..(48) ساعة ما بستحملوه – والله الخبط دا لا بقدروا عليه ولا حاجة.
  • لا ناس رونالدو ولا بنزيمة من ناسو.
  • شن قدرهم على (الخبط) دا كمان؟.
  • ضفر اذا لعب في الدوري الانجليزي ..قطع شك ما بخلي ليه (ركبة) سليمة.
  • الشيء البضمنه ليكم …اذا لعب (ضفر) في الدوري الانجليزي ان تنتعش مستشفيات اصابات الملاعب في انجلترا.

·    يعني طبيبة نادي تشيلسي السابقة  (إيفا كارنيرو) كان ح تشوفها تنزل للميدان في المباراة الواحدة (290) مرة.

·    شفتوا (الانجليزي) دا كبيتوا ليكم كيف؟.

·    لمن فهمتوا حاجة.

  • طبعا في ناس كانوا بشجعوا تشيلسي عشان (الطبيبة) دي.
  • غايتو لو ضفر لعب في الدوري الانجليزي …ح يجعل ليكم (إيفا كارنيرو) نجمة الدوري الانجليزي.
  • ما ح تشوفوا حاجة غير الطبيبة دي.
  • والاعلام الانجليزي ..ح يطلع تاني يوم ويقول اللاعب (الداعشي) دا جبتوه لينا من وين؟.
  • دا بيدخل الملعب بي متفجراته.
  • كمان (ضفر) بيلعب.
  • ضفر في (الفاشر) ما بلعب ..عاوزنو يلعب ليكم في (مانشيستر).

 

فيلم هندي

هندي اتزوج ليه هندية بالطريقة السودانية.

الهندي فرحان بالموضوع دا.

اول ما شهر العسل انتهى …الهندية رسلت لي زوجها الهندي وقالت ليه جيب معاك (كسرة).

قلنا ليكم شغلنا دا ما بتقدروا عليه – قعدتوا تغالطوا فينا.

 

حاجة حريصة

حاجة حريصة كانت بتتكلم في التلفون – قالت الضرب البحصل على (الاطباء) الايامات دي …في (المال العام) ما قاعد يحصل.

الزمن دا قالوا ليك العملية تنجح المرافقون بضربوا (تلفون) – العملية ما تنجح بضربوا (الاطباء).

 

تحذير فرنسي

لمن الحكم احتسب ضربة جزاء لفريق المريخ امس ضد الاهلي مدني ..ليه رئيس نادي الاهلي مدني ما نزل من المقصورة وسحب الفريق؟.

يا ربي ما كان عندو بدلة جديدة..

وإلا عشان حارس مرمى الاهلي مدني ابوبكر الدش ما قال ليه ننسحب.

 

وصافة مدعومة

تتخيلوا بعد التعب دا كلو ..

28 عضو في المجلس (بص الوالي).

وضربات جزاء ..(ضربة جزاء في كل مباراة).

وتأجيل مباريات..

وتسهيلات اخرى ..

ومدرب الماني قاعد في (المقصورة)..

بعد الحاجات دي كلها ..(وصافة) المريخ مجهجهة …

المريخ يجري جري الوحوش …غير (الوصافة) ما بحوش.

 

قصة قصيرة جدا

زمان الواحد وقت تعجبو (بنت) بيطلب يدها…

هسع بقى يطلب (رقم تلفونها) فقط.

 

بالارقام

ضربات الجزاء التى احتسبت للمضروب (المريخ) لو احتسبت لفريق النسور (الهابط) هسع كان النسور بنافس على المركز الثاني.

 

تنويه

الوزير لو عاوز يمدد لـ (بص الوالي) ، إلّا يمشي لي ناس الحركة (ترخيص) بص الوالي بينتهي في شهر يناير القادم.

 

في الجمال شالت جائزة نوبل

  • جائزة (نوبل) معروف امرها بما اكتسبته من شهرة وشيوع ، حيث خصصت لضروب مختلفة فى الحياة تتوزع ما بين السلام والاقتصاد والادب والعلوم والطب والفيزياء وشرعت جوائزها منذ العام 1901.
  • اما (ايج نوبل) فهى تلاعب لفظى لكلمة نوبل (Noble)  التي تعني (النبيل الشريف) وحسب ما هو معروف فانه عندما تسبق بحرفي (آى وجي) فان معناها يصبح معكوساً اى نقيض النبل والشرف .
  • جائزة (ايج نوبل) تشرف على توزيعها جامعة هارفارد الامريكية الشهيرة ويفوز بها الباحثون الذين يستحقون الجلد لانهم اضاعوا سنوات عمرهم والملايين على تلك الابحاث التى لا فائدة من معرفتها وسنت فى العام 1991.
  • ذكر انه فى عام 2007 حصلت الدكتورة اليابانية (مايو ماموتو) الباحثة فى المركز الطبى الدولى فى اليابان ، لانها قامت بتصنيع (الفانيلا) من روث الابقار والاغنام.
  • اما جائزة الفيزياء فى (ايج نوبل) فقد فاز بها البريطانى (انريكى سيدرا) بعد ان اكتشف السبب الذى يجعل مفارش السرير تتكرمش وتتجعد .
  • عليكم الله الزول الخواجة ابو عيون خضر دا ما فايق.
  • مفروض يقددوا ليه عيونه ويشيلوهن ليه فى (منديل ورق).
  • خواجات ما عندها اى موضوع.
  • جائزة الاقتصاد حصل عليها التايوانى ( كيو تشينغ) حول نصائح فى طريقة القبض على لصوص البنوك برمى شبكة عليهم.
  • تايوانى ما عندو رأس.
  • اما الطيران فجائزته يجب ان تكون لنا لكنها مع ذلك ذهبت الى فريق عالمى من جامعة (كويلمز) الوطنية بالارجنتين حول دواء يساعد (الهامستر) من مشاكل السفر بالطائرات.
  • يا جماعة شوف لينا حل نحن ، خلوه (الهامستر) طياراتنا بقن شغالة (هرس) فى الناس.
  • فى مجال الدواء فاز (بريان ويتكومى ) من الجامعة الملكية ببريطانيا بالجائزة بسبب بحثه فى الآثار الجانبية التى يسببها ابتلاع السيوف.
  • يعنى ننتظر لينا زول يبلع ليه (سيف) ثم نطبق نظرية البحث دا.
  • الناس بتبلع صوامع … مخازن … بنوك … لكن تبلع ليها (سيوف) دى اول مرة نسمع بيها.
  • اغنية الحقيبة عندنا عرضت لجائزة نوبل …وقد منحها احد الشعراء لمحبوبته التي نصبها ملكة للجمال.
  • في امريكا ابتهج العرب لأن ملكة جمال الولايات المتحدة من اصل عربي وهي من لبنان تحديدا.

 

مقفول من الاتجاهين

صلاح نمر وقت يدخل ليه على مهاجم ..تقول شايل ليه (صينية باسطة)..

يتلفت زي (رقم التلفون) الناقص…

 

داعش

قالوا ليك اندية الممتاز عاوزة تقدم شكوى جماعية في العنف الذي يلعب به عمار الدمازين.

الاندية عاوزة تقول في الشكوى ان عمار الدمازين مدافع من (داعش).

 

حقيقة إلّا شوية

الطرف اليمين في المريخ اسمه وليد بدرالدين – هذا اللاعب لو لاقاه اي مهاجم بي كورة (سنة تالتة ابتدائي) ممكن يخلص على المريخ.

 

حالة شبه

رئيس نادي الاهلي مدني في مباراة فريقه امام المريخ شغال (تكريمات) ، وفي مباراة فريقه امام الهلال بنزل من المقصورة عشان يسحب فريقه من ملعبه.

هو التواطؤ دا قالوا ليكم كيف؟.

 

فلهمة هندية

جلوس مدرب المريخ الالماني انتوني هاي في المقصورة دليل ثابت على ان المدرب الفعلي للمريخ هو عبدالصمد.

وقت مقعدنو في المقصورة …جايبنو ليه؟ – هسع القعاد في المقصورة عاوز ليه مدرب اجنبي ..وكمان الماني.

لو جبتوا ليكم (ممرض) من مستشفى ام درمان ..ممكن يقعد ليكم في المقصورة.

والله الموضوع دا لا عاوز ليه مدرب اجنبي ولا حاجة.

 

فاصل اعلاني

رئيس نادي الهلال اشرف الكاردينال الظاهر عليه قاعد يلخبط في تلفونو.

الكاردينال بدل ما يشيل (النغمة) قاعد يشيل (المدرب).

 

صورة العرس

من رئيس نادي الاهلي مدني كرم المريخ بين الشوطين بعد ضربة جزاء احتسبت لصالح المريخ وهو الذي سبق له ان سحب فريقه امام الهلال..قنعت من المباراة.

وعرفت ليكم طوالي بكري المدينة بجيب ليه قون.

بالمناسبة مباراة امس في ظل التحكيم الذي ادار المباراة ما كان محتاجة ليها لتكريم من رئيس نادي الاهلي لفريق المريخ.

الحكم براهو قام بالواجب وزيادة.

 

الحب من اول نظرة او اول طلقة

  • التعبير عن الحب في الزمن الماضي كان لا يتجاوز حد ان تكتب اول حرف في اسم من تحب في (حيطة) بطابشيرة او بفحمة ، ثم تمضي بعد ذلك وانت تحسب بانك اديت فريضة الحب وقمت بالواجب وزيادة.
  • الحب وقتها شئ من الممنوع لا يمكن التصريح به وقد كان يكتفى منه بالتلميح ، فهم من فهم ومن لم يفهم راح في ستين داهية.
  • في ضوء تلك المحاذير سادت ثقافة للحب خاصة به ، مازالت باقية وان تبدل طابعها ، هنالك الحب الاول والحب الاخير والحب من اول نظرة .. الى اخر تلك المسميات في دنيا الحب.
  • ما حقيقة الحب الاول في حياة اي شخص ، ومن اين يستمد قوته التي تجعله خالد في حياة الشخص .
  • لماذا الحب الاول وان كان وهماً يحتفظ بكل تفاصيله ويبقي في الذاكرة ، عادة هذا الحب الاول يشهد دراما خاصة فهو تسجل كل نبضاته وتحركاته ، الكراسات والدفاتر الخاصة تشهد له بذلك ، غالباً ما يصبح المحب في طور حبه الاول (شاعراً) فيكتب شعراً وقصائداً فيما يحب.
  • الشاعر ابو تمام اعلن من موقع للحب الاول موقفا اصبح مرجعاً للحب الاول واضحت ابيات ابوتمام تلك نصيراً للحب الاول يصدح بها كلما كان الحديث عنه:

نقل فؤادك حيث شئت من الهوى       ما الحب الا للحبيب الأول

كم منزل فى الأرض يألفه الفتى        وحنينه أبداً لأول منــــــزل

  • كلنا يعرف هذه الأبيات لكن ما مدى صحتها البعض يراها وهماً والبعض الآخر يراها حقيقة.
  • إحسان عبد القدوس حسب الحب الاول وحفظ له ذلك التسجيل فقال ” فى حياة كل منا وهم جميل يسمى : الحب الأول . لاتصدق .. فإن حبك الأول هو حبك الأخير!!”.
  • من ضمن ما يعرف في مصطلحات الحب ، الحب الذي يقال عنه انه (حب من اول نظرة) ، وهو حب ينتجه الاعجاب القوي ، وغالباً ما يكون مصير ذلك الحب الفشل لانه مبني علي تقديرات خاطئة ، مثل الحب الاول تماما الذي يفشل ايضاً بسبب المصاعب التي تواجه والعقبات التي تصدم به فتفشله.
  • احسب ان الحب الاول ، حب تأتي الظروف عكسه ، لذلك يكون مصيره حزيناً في الغالب.
  • لنا ان نراجع دفاتر الحب من اول نظرة وان نقف في بعض تجاربه.
  • الكاتب الأمريكي (أريك جودمان) بعد إجراء بحث ميداني على مجموعة كبيرة من الشباب من الجنسين في المدارس الثانوية وبداية المرحلة الجامعية في نيويورك خلص الى أن الانطباع القوي الناجم عن اللقاء الأول بين الفتاة والشاب والذي يطلق عليه الكثيرون اسم (الحب من أول نظرة)، يكون خداعاً في أغلب الأحوال.
    فقد يكون هذا الإحساس ناجماً عن ولع أحدهما بفكرة الحب نفسها أو لأن أحدهما حاول تجسيد صورة أو صفات المحبوب الموجودة في الخيال عند الآخر، ثم يتكشف له في المستقبل أن الخيال مخالف للواقع كما أن الإعجاب القائم على الشكل الخارجي وليس الجوهر الداخلي سرعان ما يتلاشي.
  • في جامعة فلوريدا الأميركية اكد باحثون في أول تفسير علمي لظاهرة الإعجاب المفاجئ، أن هناك أشخاصا يتمتعون بجاذبية الوجوه والأشكال .
    بحيث يشدون أنظارالناس اليهم ويقعون في حبهم من أول نظرة. وقد أرجع جون مينر الأستاذ المساعد في علم النفس في الجامعة – الذي أشرف على الدراسة المنشورة السبب وراء هذا الإعجاب المفاجئ إلى أن هذا الأمر أشبه بجذب مغناطيسي، إلا أنه يتم على مستوى الإهتمام البصري.
  • كما شرح مينر أن الإعجاب يأتي على رأس قائمة التغيرات الكثيرة التي تطرأ على حياة الناس دون أن يشعروا بها ويسعون جاهدين لإيجاد المدلول أو التفسير العلمي الصحيح لها، ومن بينها ما يعرف بالحب من أول نظرة. وتأتى هذه الحالة عادة عندما تقع العين على شخص ما، فيعجب بإحدى صفاته كمظهره وقوامه أو ملامح وجهه وابتسامته ونظرته أو طريقة كلامه ونبرات صوته أو تصرفاته، أو شخصيته أو حتى لون عينيه.
  • هنالك مصطلحات اخري للحب عبر مراحله المختلفة ، ومثلما هنالك الحب الاول هنالك الحب الاخير ، وهنالك الحب الافلاطوني وهنالك الحب الصامت والحب الجنوني ومن الملاحظ ان ذاكرة الاغاني السودانية سجلت لكل هذه الوقائع للحب.
  • هنالك الحب الذي يؤدي الي الجنون وقد تحدى به شاعره ذلك المنتهي المخيف فقال </p />
</li></ul>  </div>

  
  </div>
<div class=

Share this